صحت کے مشیر احتشام علی نے پختونخوا کے پہلے ائیر ایمبولینس کا جائزہ لیا اور ٹیسٹ فلائیٹ بھی لی۔ ائیرایمبولینس کے بارے میں بریفنگ دی گئی۔ مشیر صحت نے بتایا کہ حکومت خیبرپختونخوا اپنے ایم آئی 17 ہیلی کاپٹر کو ائیر ایمبولینس میں تبدیل کر رہی ہے۔ وزیراعلیٰ خیبر پختونخوا کی خصوصی ہدایت پر صوبائی حکومت کے ہیلی کاپٹر سے ائیر ایمبولینس کی خدمات لی جا رہی ہیں۔

مشیر صحت کا کہنا تھا کہ اس ہیلی کاپٹر کو پہلی بار انسانی فلاح و بہبود کیلئے استعمال میں لایاجارہا ہے۔ وزیراعلیٰ خیبرپختونخوا نے کرم کی صورتحال میں سرکاری ہیلی کاپٹر کو عوامی خدمات کیلئے پیش کیا۔ اس ہیلی کاپٹر کے ذریعے ادویات پہنچائی گئیں اور مریضوں کو محفوظ مقامات پر منتقل کیا گیا۔ اس ہیلی کاپٹر سروس نے ہزاروں لوگوں کی جانیں بچائی ہیں۔ ان کا مزید کہنا تھا کہ ہیلی کاپٹر میں ائیر ایمبولینس کیلئے مجوزہ الٹریشنز اور ضروری طبی آلات نصب کیے جا رہے ہیں۔ یہ ایک سٹیٹ آف دی آرٹ بین الاقوامی معیار کا ملک کا پہلا ائیر ایمبولینس ہوگا۔ ہم ائیر ایمبولینس کرائے پر نہیں لا رہے، اپنا ہیلی کاپٹر عوام کی خدمت کے لیے پیش کر رہے ہیں۔