پشاور: خیبرپختونخوا کلچر اینڈ ٹورازم اتھارٹی کے تحت تمام ٹور گائیڈز اور ٹور آپریٹرز کو سختی سے ہدایت کی گئی ہے کہ وہ خیبرپختونخوا کے سیاحتی مقامات پر سرگرمیوں سے قبل لازمی طور پر رجسٹریشن اور لائسنس حاصل کریں۔ یہ اقدام “ٹورازم ایکٹ 2019” کے سیکشن 2، کلاز (af)، شیڈول I-(b) اور “ہاسپیٹیلیٹی اینڈ ٹورازم سیکٹر ریگولیشن 2021” کی کلاز 60 کے تحت کیا جا رہا ہے۔

کنٹرولر ٹورسٹ سروسز ونگ، عمر خان کے مطابق، ٹورازم سروسز ونگ کی انسپکشن ٹیمیں اب سیاحتی مقامات پر متحرک ہوں گی اور ان تمام ٹور گائیڈز و آپریٹرز کی چیکنگ کی جائے گی جو بغیر لائسنس کے سرگرمیوں میں مصروف ہوں گے۔ خلاف ورزی کی صورت میں نہ صرف موقع پر بھاری جرمانہ (جو کہ 40 ہزار روپے تک ہو سکتا ہے) عائد کیا جائے گا بلکہ غیر رجسٹرڈ آپریٹرز کو ان کے گروپس سمیت سیاحتی مقام سے واپس بھیج دیا جائے گا۔

عمر خان نے سیاحوں سے بھی اپیل کی ہے کہ وہ اپنے ٹور پلان کرنے سے پہلے متعلقہ ٹور گائیڈ اور آپریٹرز کے لائسنس کی تصدیق ضرور کریں تاکہ کسی بھی ناخوشگوار صورت حال سے بچا جا سکے اور ایک ذمہ دار سیاح ہونے کا ثبوت دیا جا سکے۔