وزیراعلیٰ خیبرپختونخوا کی زیر صدارت صوبائی اپیکس کمیٹی کا ایک اہم اجلاس منعقد ہوا، جس میں کور کمانڈر پشاور، چیف سیکرٹری، انسپکٹر جنرل پولیس اور دیگر اعلیٰ سول و عسکری حکام نے شرکت کی۔ اجلاس میں صوبے میں دہشت گردی اور فتنہ الخوارج کے مکمل خاتمے کے لیے جامع حکمت عملی پر تفصیلی غور کیا گیا۔ اجلاس کے بعد جاری اعلامیے کے مطابق دہشت گردی کے خلاف تمام سیاسی جماعتوں اور وفاقی حکومت کے ساتھ مشترکہ لائحہ عمل اپنانے پر اتفاق کیا گیا ہے۔ اعلامیے میں کہا گیا کہ حکومت امن و امان کے قیام کے لیے کسی قربانی سے دریغ نہیں کرے گی اور تمام ادارے مکمل طور پر متحرک رہیں گے۔ اجلاس میں دہشت گردی سے متاثرہ علاقوں کو ماڈل گڈ گورننس اضلاع میں تبدیل کرنے کا فیصلہ بھی کیا گیا۔ اس مقصد کے لیے سیکیورٹی، صحت، تعلیم، روزگار اور ترقیاتی منصوبوں پر مشتمل خصوصی پیکج کا اعلان کیا گیا۔ وزیراعلیٰ نے اجلاس سے خطاب کرتے ہوئے کہا کہ عارضی طور پر نقل مکانی کرنے والے افراد کی باعزت واپسی حکومت کی اولین ترجیح ہے، اور متاثرہ علاقوں میں بنیادی سہولیات کی فراہمی کو یقینی بنایا جائے گا۔ انہوں نے مزید کہا کہ امن پر کوئی سمجھوتہ نہیں کیا جائے گا، سول حکومت اور سیکیورٹی ادارے ایک پیج پر ہیں اور صوبے میں پائیدار امن کے لیے مشترکہ کوششیں جاری رہیں گی۔