بنوں: جنرل آفیسر کمانڈنگ 7 ڈویژن میجر جنرل عادل افتخار وڈائچ کی زیر قیادت بکا خیل کے عارضی طور پر بے گھر افراد (ٹی ڈی پیز) کے عمائدین کے ساتھ اہم جرگہ منعقد ہوا، جس میں مقامی برگیڈکمانڈر برگیڈئیر نوید احمد، سول انتظامیہ اور دیگر متعلقہ حکام نے شرکت کی۔ جرگے میں عمائدین نے مالی امداد، ری پیٹری ایشن پیکیج اور کیمپ میں بنیادی سہولیات کی عدم فراہمی جیسے اہم مسائل اٹھائے۔
جنرل آفیسر کمانڈنگ نے شرکاء کو یقین دلایا کہ حکومت ٹی ڈی پیز کے مسائل سے بخوبی آگاہ ہے اور ان کے حل کے لیے تمام وسائل بروئے کار لائے جا رہے ہیں۔ انہوں نے بتایا کہ صوبائی حکومت کے ساتھ مسلسل رابطہ جاری ہے اور انتظامی منظوری کے بعد ابتدائی طور پر 2 سے 3 ماہ کی مالی امداد جلد جاری کی جائے گی۔ انہوں نے اس بات پر زور دیا کہ ٹی ڈی پیز کی باعزت واپسی کے لیے نہ صرف مالی معاونت بلکہ سیکیورٹی، روزگار کے مواقع اور بنیادی سہولیات کی بحالی بھی ضروری ہے۔
جی او سی نے یہ بھی کہا کہ احتجاج اور سڑکوں کی بندش سے مسائل حل نہیں ہوتے، بلکہ بات چیت اور مشاورت کے ذریعے ہی دیرپا حل ممکن ہے۔ انہوں نے اعلان کیا کہ ایک اعلیٰ سطحی کمیٹی قائم کی جا رہی ہے جو تمام مسائل کا جامع جائزہ لے کر عملی اقدامات تجویز کرے گی۔