خیبر پختونخوا میں یوم تکبیر کا جشن، ریلیاں، سیمینارز، دعائیہ مجالس و تقریبات
پاکستان کے ایٹمی تجربات کو 27 برس مکمل ہونے پر بدھ کے روز ملک بھر کی طرح خیبر پختونخوا میں بھی یومِ تکبیر ملی جوش و جذبے کے ساتھ منایا گیا۔ 28 مئی 1998 کو چاغی کے پہاڑوں میں ہونے والے ایٹمی تجربات کی یاد میں مختلف تقریبات، ریلیوں، سیمینارز اور دعائیہ مجالس کا انعقاد کیا گیا، جن کا مقصد پاکستان کی دفاعی خودمختاری، قومی وحدت اور قربانیوں کو خراجِ تحسین پیش کرنا تھا۔
پشاور: مسلم لیگ (ن) کی تقریب، “معرکۂ حق اور اظہارِ تشکر“
پشاور میں پاکستان مسلم لیگ (ن) خیبرپختونخوا کے زیراہتمام ایک پروقار تقریب منعقد ہوئی، جس میں صوبائی صدر اور وفاقی وزیر امیر مقام، سابق گورنر اقبال ظفر جھگڑا سمیت دیگر سیاسی و سماجی شخصیات نے شرکت کی۔ تقریب کا عنوان “معرکۂ حق اور اظہارِ تشکر” رکھا گیا تھا۔ مقررین نے کہا کہ 28 مئی پاکستان کی تاریخ کا وہ دن ہے جب دشمن کے ایٹمی غرور کا جواب دے کر پاکستان نے اسلامی دنیا کی پہلی ایٹمی طاقت بننے کا اعزاز حاصل کیا۔
گورنر خیبر پختونخوا کا پیغام: “یومِ تکبیر ایک نظریہ ہے“
گورنر خیبر پختونخوا فیصل کریم کنڈی نے یومِ تکبیر کے موقع پر اپنے خصوصی پیغام میں پوری قوم کو مبارکباد دی۔ انہوں نے کہا کہ یہ دن ہمیں اس عزم کی یاد دلاتا ہے جو ذوالفقار علی بھٹو نے ”ہم گھاس کھا لیں گے، مگر ایٹم بم بنائیں گے“ کے نعرے سے شروع کیا اور اسے ڈاکٹر عبدالقدیر خان جیسے ہیروز نے عملی جامہ پہنایا۔ انہوں نے مزید کہا کہ پاکستان دنیا و خطے میں امن کا خواہاں ہے مگر اپنی خودمختاری پر کوئی سمجھوتہ نہیں کرے گا۔
شمالی وزیرستان، سرا روغہ: “ڈے آؤٹ وِد آرمی” کی رنگا رنگ تقریب
شمالی وزیرستان کے علاقے سرا روغہ میں “ڈے آؤٹ وِد آرمی” کے عنوان سے ایک رنگا رنگ تقریب کا انعقاد کیا گیا۔ مقامی اسکولوں کے طلباء اور اساتذہ نے بھرپور شرکت کی۔ کھیلوں، ملی نغموں، اور فوجی ساز و سامان کی نمائش نے تقریب کو یادگار بنا دیا۔ کمانڈنگ افسر نے طلباء میں انعامات تقسیم کیے اور کہا کہ قوموں کی سلامتی میں نوجوان نسل کا کردار بنیادی حیثیت رکھتا ہے۔
میرانشاہ: یومِ تجدیدِ عہد
میرانشاہ میں اسسٹنٹ کمشنر شاہ ولی کی قیادت میں یومِ تکبیر کی تقریب کا انعقاد کیا گیا۔ تقریب میں قبائلی مشران، نوجوان، طلباء اور سرکاری افسران کی بڑی تعداد نے شرکت کی۔ مقررین نے یوم تکبیر کو قومی وقار اور دفاع کا دن قرار دیتے ہوئے کہا کہ دشمن کی ہر جارحیت کا جواب دینا ہماری دفاعی طاقت کا ثبوت ہے۔
مردان: حب الوطنی سے لبریز ریلی و پرچم کشائی
ڈپٹی کمشنر مردان ڈاکٹر عظمت اللہ وزیر کی ہدایت پر کے پی ہاؤس مردان میں پرچم کشائی اور یوم تکبیر ریلی منعقد کی گئی۔ اسسٹنٹ کمشنر کامران خان، ایڈیشنل اسسٹنٹ کمشنرز، ڈی ایس پی، اساتذہ، طلبہ اور تاجر برادری کے نمائندگان نے شرکت کی۔ مقررین نے کہا کہ پاکستان کی ایٹمی طاقت دشمنوں کے لیے پیغامِ بازدار ہے۔
مہمند: قبائلی عمائدین کا جوش و خروش
قبائلی ضلع مہمند کے میاں منڈی گنداؤ بازار میں نکالی گئی ریلی میں ڈپٹی کمشنر محمد یاسر حسن، دیگر افسران، قبائلی مشران اور عوام کی بڑی تعداد شریک ہوئی۔ ریلی کے دوران ڈاکٹر عبدالقدیر خان کو بھرپور خراجِ تحسین پیش کیا گیا اور قومی یکجہتی کا مظاہرہ کیا گیا۔
کوہاٹ: تعلیمی اداروں کے طلباء کا جوش و خروش
کوہاٹ میں مرکزی تقریب کے دوران بچوں نے ملی نغمے، خاکے اور تقاریر پیش کیں۔ کمشنر کوہاٹ معتصم باللہ شاہ اور ڈپٹی کمشنر عبد الاکرم نے خطاب کرتے ہوئے یومِ تکبیر کو پاکستان کی دفاعی خودمختاری کا سنگ میل قرار دیا۔ والدین، اساتذہ اور طلباء کی بڑی تعداد نے شرکت کی۔
لنڈی کوتل: ریلی میں عوامی شرکت
ضلع خیبر کے تحصیل کمپاؤنڈ لنڈی کوتل میں ضلعی انتظامیہ کے زیراہتمام ریلی نکالی گئی۔ شرکاء نے پاکستان اور افواجِ پاکستان کے حق میں نعرے لگائے اور ڈاکٹر عبدالقدیر خان کی قربانیوں کو خراجِ تحسین پیش کیا۔ بعد ازاں ملکی سلامتی کے لیے خصوصی دعا بھی کی گئی۔
نوشہرہ: سیاسی اتحاد کی قیادت میں عوامی ریلی
نوشہرہ کے شعبرا چوک میں ایک بڑی ریلی نکالی گئی جس میں عوام کی بڑی تعداد شریک ہوئی۔ مفتی حاکم علی حقانی نے خطاب کرتے ہوئے کہا کہ یومِ تکبیر ہمیں اپنی دفاعی صلاحیت پر فخر کرنے اور اتحاد کے ساتھ آگے بڑھنے کا پیغام دیتا ہے۔
لکی مروت یونیورسٹی: عسکری قیادت کا طلباء سے خطاب
لکی مروت یونیورسٹی میں یومِ تکبیر کی تقریب میں جنرل آفیسر کمانڈنگ میجر جنرل نیک نام نے شرکت کی۔ طلباء، اساتذہ، سول و عسکری افسران نے شرکت کی۔ مقررین نے نوجوانوں کو سوشل میڈیا پر مثبت بیانیہ اپنانے اور خوارج جیسے عناصر کے خلاف قومی یکجہتی کے پیغام کا پرچار کرنے پر زور دیا۔
