چترال: کیلاش قبیلے کا مذہبی تہوار چترموس (چاؤموس) وادی کیلاش بمبوریت میں اختتام پذیر ہو گیا، جو کیلاش کی تینوں وادیوں رمبور، بریر اور بمبوریت میں روایتی جوش و خروش کے ساتھ منایا گیا۔ ترجمان ٹورازم اتھارٹی محمد سعد کے مطابق تہوار کے دوران مختلف مذہبی اور ثقافتی رسومات ادا کی گئیں جبکہ ملکی و غیر ملکی سیاحوں کی بڑی تعداد نے فیسٹیول میں شرکت کی۔ انہوں نے بتایا کہ فیسٹیول کے دوران ٹورازم پولیس کے نوجوانوں نے سیاحوں کو سہولیات فراہم کیں اور لواری ٹنل سمیت کیلاش جانے والے تمام راستوں پر ٹورازم پولیس تعینات رہی۔ ترجمان کے مطابق کیلاش ڈیویلپمنٹ اتھارٹی کی جانب سے بھی سیاحوں کے لیے مختلف سہولیات فراہم کی گئیں۔ محمد سعد نے کہا کہ چترموس تہوار موسم سرما کی آمد پر خوشی اور امن کی علامت کے طور پر منایا جاتا ہے، جس میں باہمی محبت، اتحاد اور امن کے پیغام کے طور پر پھل، سبزیاں اور خشک میوہ جات تقسیم کیے جاتے ہیں۔ انہوں نے مزید کہا کہ سیاح سفر سے قبل ٹورازم ہیلپ لائن 1422 سے ہر قسم کی معلومات حاصل کر سکتے ہیں۔