اجلاس میں وزیر اعلیٰ نے سوات موٹروے فیز ٹو کے تعمیراتی کام کا باضابطہ آغاز کرنے کا فیصلہ کرتے ہوئے متعلقہ حکام کو ضروری اقدامات کی ہدایت کی۔ اجلاس میں شریک صوبائی وزیر سہیل آفریدی نے کہا کہ سوات موٹروے فیز ٹو کی تکمیل سے ملاکنڈ ریجن میں معاشی سرگرمیوں کو نمایاں فروغ ملے گا اور سیاحت و تجارت کے نئے مواقع پیدا ہوں گے۔ وزیر اعلیٰ نے صوبائی ٹرانسمشن لائن منصوبے کے فیز ٹو میں درپیش مسائل کے حل کے لیے بھی نتیجہ خیز اقدامات کی ہدایت جاری کی۔ اس موقع پر سہیل آفریدی نے کہا کہ پن بجلی منصوبوں سے مکمل استفادہ کے لیے صوبائی ٹرانسمشن لائن منصوبے کی بروقت تکمیل ناگزیر ہے۔
اجلاس میں وزیر اعلیٰ نے ارشد شریف یونیورسٹی آف انوسٹی گیٹو اینڈ ماڈرن جرنلزم پر عملی کام کے آغاز کے لیے اقدامات کرنے کی بھی ہدایت کی۔ اس کے علاوہ لائیو سٹاک یونیورسٹی پر کام تیز کرنے اور انجینئرنگ یونیورسٹی کو ڈی ایف سی اسکیم کے تحت جلد مکمل کرنے کے احکامات بھی جاری کیے گئے۔ وزیراعلیٰ نے ہدایت کی کہ ریجن میں تکمیل کے قریب میگا پراجیکٹس کو مقررہ وقت پر مکمل کیا جائے جبکہ نئی ترقیاتی اسکیموں پر کام کا آغاز بھی یقینی بنایا جائے۔ اجلاس میں صحت کے شعبے میں بہتری کے لیے مختلف ہسپتالوں کی ضرورت کے مطابق اپگریڈیشن سے اصولی اتفاق کیا گیا۔
انہوں نے کہا کہ ہائیڈل پراجیکٹس کی رائلٹی کے لیے نامزد اکاؤنٹس قائم کیے جائیں گے تاکہ رائلٹی کی رقم براہ راست متعلقہ اضلاع کی ترقی پر خرچ کی جا سکے۔ اجلاس میں رستم امبیلا روڈ، براول مستوج روڈ، دیر کیڈٹ کالج، تالاش بائی پاس اور چترال نرسنگ کالج سمیت دیگر منصوبوں کو نئے ترقیاتی پروگرام میں شامل کرنے سے اصولی اتفاق کیا گیا۔ وزیر اعلیٰ نے پارلیمنٹرینز کو ہدایت کی کہ وہ 15 مارچ تک اپنے حلقوں میں مجوزہ ترقیاتی اسکیموں کی نشاندہی کریں، جبکہ آئندہ ہفتے سے ان منصوبوں کے حوالے سے فالو اپ اجلاسوں کا سلسلہ بھی شروع کیا جائے گا۔
