ڈپٹی کمشنر پشاور سرمد سلیم اکرم نے عیدالاضحی کے سلسلے میں شہر میں قائم مویشی منڈیوں کا تفصیلی دورہ کیا، جہاں انہوں نے جی ٹی روڈ اور رنگ روڈ پر موجود منڈیوں کے انتظامات کا جائزہ لیا۔ دورے کے دوران ایڈیشنل ڈپٹی کمشنر (جنرل) راؤ ہاشم، اسسٹنٹ کمشنر سٹی داؤد سلیمی، اسسٹنٹ کمشنر شاہ عالم ایس ارحم مختیار اور محکمہ لائیوسٹاک، کیپٹل میٹروپولیٹن گورنمنٹ، ٹی ایم اے چمکنی سمیت دیگر متعلقہ اداروں کے افسران بھی موجود تھے۔
دورے کے دوران افسران نے مویشی منڈیوں میں صفائی، سیکیورٹی، جانوروں کے معائنے، پانی، سایہ دار جگہوں اور ٹریفک کنٹرول سے متعلق انتظامات پر ڈپٹی کمشنر کو بریفنگ دی۔ ڈپٹی کمشنر نے ہدایت دی کہ عوامی سہولت کو مدنظر رکھتے ہوئے ہر منڈی میں متعلقہ محکموں کے اہلکار ہمہ وقت موجود رہیں اور محکمہ لائیوسٹاک کے ویٹرنری ڈاکٹرز انٹری پوائنٹس پر جانوروں کا باقاعدہ معائنہ کریں اور اسپرے کا عمل یقینی بنائیں تاکہ بیماریوں سے بچاؤ ممکن ہو۔
انہوں نے صفائی کی صورتحال بہتر بنانے، صاف پانی کی فراہمی، سایہ دار انتظار گاہوں کے قیام اور مؤثر سیکیورٹی کے لیے پولیس و ٹریفک پولیس کی تعیناتی کی بھی ہدایت جاری کی۔ ڈپٹی کمشنر نے واضح کیا کہ غیر قانونی منڈیوں یا بغیر اجازت نامے کے لگائی گئی منڈیوں کے خلاف سخت کارروائی کی جائے گی تاکہ شہریوں کو کسی پریشانی کا سامنا نہ ہو اور نظم و ضبط برقرار رہے۔ ضلعی انتظامیہ نے عوام سے اپیل کی ہے کہ وہ صرف رجسٹرڈ اور منظور شدہ مویشی منڈیوں سے قربانی کے جانور خریدیں تاکہ نہ صرف انہیں سہولیات فراہم کی جا سکیں بلکہ قانونی اور محفوظ خرید و فروخت کو فروغ بھی دیا جا سکے۔
