سہ فریقی مذاکرات میں شرکت کیلئے نائب وزیراعظم اسحاق ڈار کابل پہنچ گئے۔ ترجمان دفتر خارجہ کے مطابق نائب وزیراعظم و وزیر خارجہ محمد اسحاق ڈار پاکستان، چین اور افغانستان کے درمیان سہ فریقی مذاکرات کے تیسرے دور میں شرکت کے لیے کابل پہنچ گئے۔ کابل ایئرپورٹ پر افغانستان کے نائب وزیر خارجہ محمد نعیم، چیف آف اسٹیٹ پروٹوکول فیصل جلالی، ڈائریکٹر جنرل فرسٹ پولیٹیکل مفتی نور احمد اور افغانستان میں پاکستان کے سفیر عبید الرحمان نظامانی نے وزیر خارجہ کا استقبال کیا۔ ترجمان کے مطابق سہ فریقی مذاکرات میں تینوں ممالک کے درمیان تجارت، علاقائی روابط اور انسدادِ دہشت گردی کے شعبوں میں تعاون بڑھانے پر بات چیت کی جائے گی۔
کابل میں قیام کے دوران محمد اسحاق ڈار افغان وزیر خارجہ مولوی امیر خان متقی سے دوطرفہ تعلقات اور باہمی دلچسپی کے امور پر بھی ملاقات کریں گے۔
