خیبرپختونخوا ہیلتھ کیئر کمیشن نے اپنی تین ماہ کی کارکردگی رپورٹ جاری کر دی ہے، جس کے مطابق صوبے میں طبی مراکز کے خلاف کارروائیوں اور نگرانی کے عمل میں نمایاں اضافہ دیکھنے میں آیا ہے۔ ترجمان ہیلتھ کیئر کمیشن عزم رحمان کے مطابق صرف تین ماہ کے دوران 785 نئے طبی مراکز کو رجسٹر کیا گیا، جس کے بعد صوبے میں مجموعی رجسٹرڈ طبی مراکز کی تعداد 21 ہزار 442 تک پہنچ گئی۔
رپورٹ کے مطابق تین ماہ میں مجموعی طور پر 7,544 طبی مراکز کا انسپیکشن کیا گیا، جن میں سے 3,523 مراکز کو مختلف خلاف ورزیوں پر جواب طلبی کے نوٹس جاری کیے گئے، جبکہ 1,650 طبی مراکز کو قوانین کی خلاف ورزی پر سیل کیا گیا۔ اسی دوران 133 طبی مراکز کی جانچ پڑتال مکمل کی گئی، جس کے نتیجے میں 41 مراکز کو مکمل جبکہ 184 کو عبوری لائسنس جاری کیے گئے۔ سال 2022 میں لائسنسنگ کے عمل کے آغاز سے اب تک مجموعی طور پر 509 مراکز کی جانچ پڑتال کی جا چکی ہے، جن میں سے 173 مراکز کو مکمل لائسنس جاری ہوئے ہیں۔
رپورٹ میں بتایا گیا ہے کہ گزشتہ تین ماہ کے دوران “خدماتِ صحت کے معیار” کے موضوع پر 11 تربیتی سیشنز کا انعقاد کیا گیا، جن سے صوبے کے مختلف اضلاع سے تعلق رکھنے والے 362 طبی عملے نے تربیت حاصل کی۔ لائسنسنگ کے آغاز سے اب تک مجموعی طور پر 1,656 طبی عملہ صحت کے معیار سے متعلق تربیت حاصل کر چکا ہے۔
