وفاقی محتسب اعجاز احمد قریشی کی مداخلت اور فیصلے سے اوگی، مانسہرہ سے تعلق رکھنے والی ایک بیوہ کو دو سال سے رکی ہوئی فیملی پنشن کی مد میں 3,22,730 روپے کے بقایاجات جاری کر دیے گئے۔ بیوہ محمد زمان نے وفاقی محتسب کے ریجنل دفتر ایبٹ آباد میں محکمہ کنٹرولر ملٹری اکاؤنٹس (پنشن) لاہور کے خلاف شکایت درج کروائی تھی۔ ان کا موقف تھا کہ تمام ضروری دستاویزات جمع کروانے کے باوجود دو سال سے ان کی پنشن بقایاجات جاری نہیں کیے جا رہے تھے۔ شکایت درج ہونے کے فوری بعد وفاقی محتسب سیکرٹریٹ ریجنل آفس ایبٹ آباد نے محکمہ کنٹرولر ملٹری اکاؤنٹس (پنشن) لاہور کو نوٹس جاری کیا۔
کیس کی مکمل چھان بین کے بعد وفاقی محتسب اعجاز احمد قریشی نے شکایت دہندہ کے حق میں فیصلہ سناتے ہوئے متعلقہ محکمہ کو فوری طور پر پنشن بقایاجات جاری کرنے کا حکم دیا۔محکمہ نے فیصلے پر عملدرآمد کرتے ہوئے شکایت دہندہ کو 3,00,895 روپے بقایاجات اور 21,895 روپے ماہانہ پنشن جاری کر دی۔ بقایاجات کے حصول کے بعد بیوہ محمد زمان نے وفاقی محتسب اعجاز احمد قریشی اور وفاقی محتسب ریجنل آفس ایبٹ آباد کے ڈپٹی رجسٹرار عدنان جدون کا شکریہ ادا کیا جن کی کوششوں سے ان کا دیرینہ مسئلہ حل ہوا۔
اس موقع پر وفاقی محتسب ہزارہ ڈویژن کے ایڈوائزر انچارج رشید احمد نے کہا کہ وفاقی محتسب کا ادارہ وفاقی محکموں میں پائی جانے والی بد انتظامیوں کے خلاف فوری اقدامات کرتا ہے۔ انہوں نے کہا کہ عوامی مسائل کے حل کے لیے شکایات کا بلاتاخیر ازالہ کیا جاتا ہے اور فیصلے پر عملدرآمد میں کوئی کوتاہی برداشت نہیں کی جاتی۔رشید احمد نے مزید کہا کہ وفاقی محتسب کا ادارہ ایک عوامی عدالت ہے جہاں شکایات بلا معاوضہ اور فوری طور پر حل کی جاتی ہیں۔ عوام الناس کو چاہیے کہ اپنے مسائل کے حل کے لیے وفاقی محتسب کے ادارے سے رجوع کریں اور اس سہولت سے مستفید ہوں۔
