خیبر: تحصیل لنڈی کوتل کے گورنمنٹ عمار شہید ہائی سکول میں خیبر رائفلز کے زیر اہتمام علاقہ مکینوں کے لیے فری میڈیکل کیمپ کا انعقاد کیا گیا، جس میں میل اور فی میل ڈاکٹرز کی ٹیم نے مرد، خواتین اور بچوں سمیت 1210 مریضوں کا طبی معائنہ کیا اور انہیں مفت ادویات فراہم کیں۔
کیمپ کے دوران مقامی ونگ کمانڈر لیفٹننٹ کرنل بلال لیاقت نے کیمپ کا دورہ کیا اور علاج معالجے کے انتظامات کا جائزہ لیا۔ انہوں نے مریضوں سے ملاقات کی اور فراہم کی جانے والی سہولیات کو معیاری اور تسلی بخش قرار دیا۔
علاقے کے عوام نے فری میڈیکل کیمپ کے انعقاد پر فرنٹیئر کور نارتھ، خیبر رائفلز کے کمانڈنٹ کرنل سعید احمد، لیفٹننٹ کرنل بلال لیاقت اور دیگر حکام کے اقدامات کو سراہا اور صحت کی سہولیات عوام تک پہنچانے پر ان کا خصوصی شکریہ ادا کیا۔
اہل علاقہ کا کہنا تھا کہ ایسے فری میڈیکل کیمپس سے عوام کو گھر کی دہلیز پر بنیادی طبی سہولیات میسر آتی ہیں، جو ایک قابلِ تحسین اقدام ہے اور مقامی کمیونٹی کی صحت و بہبود کے لیے نہایت اہم ثابت ہو رہا ہے۔
