ضلعی انتظامیہ کے تعاون سے شہدائے اے پی ایس یونیورسٹی آف ٹیکنالوجی نوشہرہ، امان گڑھ میں 7 روزہ سپورٹس گالا کا شاندار انعقاد کیا گیا، جس کی افتتاحی تقریب میں ڈپٹی کمشنر نوشہرہ محمد عرفان اللہ محسود نے وائس چانسلر کے ہمراہ بطور مہمانِ خصوصی شرکت کرتے ہوئے باقاعدہ افتتاح کیا۔ سپورٹس گالا میں یونیورسٹی کے طلباء و طالبات بھرپور جوش و جذبے سے حصہ لے رہے ہیں، جہاں مختلف کھیلوں کے مقابلے منعقد کیے جا رہے ہیں۔ ان مقابلوں میں کرکٹ، فٹبال، بیڈمنٹن، والی بال، ٹیبل ٹینس اور دیگر کھیل شامل ہیں۔
اس موقع پر ڈپٹی کمشنر نوشہرہ نے کہا کہ کھیل نوجوانوں کی جسمانی اور ذہنی نشوونما میں اہم کردار ادا کرتے ہیں اور ایسی صحت مند سرگرمیاں طلبہ کو مثبت، تعمیری اور منظم طرزِ زندگی کی طرف راغب کرتی ہیں۔ انہوں نے اس سپورٹس گالا کے کامیاب انعقاد پر یونیورسٹی انتظامیہ اور ضلعی انتظامیہ کی کاوشوں کو سراہا۔ منتظمین کے مطابق سپورٹس گالا کے انعقاد کا بنیادی مقصد تعلیمی سرگرمیوں کے ساتھ ساتھ غیر تدریسی اور صحت مندانہ سرگرمیوں کو فروغ دینا اور نوجوان نسل کو جسمانی طور پر متحرک رکھنے کے ساتھ ساتھ مثبت سمت میں آگے بڑھانا ہے۔ یونیورسٹی انتظامیہ نے عزم ظاہر کیا کہ مستقبل میں بھی ایسے کھیلوں کے مقابلوں کا تسلسل جاری رکھا جائے گا تاکہ طلبہ کی ہمہ جہت شخصیت سازی کو فروغ دیا جا سکے۔
