خیبرپختونخوا میں 20 سے 24 مئی کے دوران گرمی کی شدت میں اضافے کا امکان ہے۔ پی ڈی ایم اے کی جانب سے جاری مراسلے کے مطابق دن کے اوقات میں درجہ حرارت معمول سے 5 تا 7 ڈگری سینٹی گریڈ تک بڑھ سکتا ہے، جبکہ جنوبی اور وسطی علاقوں میں گرمی کی لہر بدستور برقرار رہنے کی پیشگوئی ہے۔ شدید گرمی کے سبب گرد و غبار اور تیز ہواؤں کا خدشہ بھی ظاہر کیا گیا ہے، جس کے پیش نظر شہریوں کو احتیاطی تدابیر اپنانے کی ہدایت دی گئی ہے۔ ہیٹ ویو اور خشک موسم کے باعث ہیٹ اسٹروک، آبی ذخائر پر دباؤ اور بالائی علاقوں میں برف کے پگھلنے کی رفتار میں اضافے کا بھی امکان ہے۔
پی ڈی ایم اے نے تمام ضلعی انتظامیہ، ہیلتھ و ریسکیو اداروں، پیرا میڈیکس اور دیگر متعلقہ محکموں کو الرٹ رہنے اور ہیٹ اسٹروک سینٹرز کو فعال رکھنے کی ہدایات جاری کی ہیں۔ عوام کو غیر ضروری طور پر سورج کی براہِ راست روشنی سے بچنے، پانی کا استعمال بڑھانے، اور بزرگوں و بچوں کو صبح 10 بجے سے شام 5 بجے تک دھوپ سے محفوظ رکھنے کی ہدایت دی گئی ہے۔ کسانوں کو فصلوں کی کٹائی کے دوران احتیاط برتنے اور جانوروں کا خاص خیال رکھنے کا بھی کہا گیا ہے۔ عوامی آگاہی مہم کے ذریعے شہریوں کو موجودہ صورتحال سے باخبر رکھا جائے گا۔ پی ڈی ایم اے نے تمام اداروں کو ہنگامی صورت حال سے نمٹنے کے لیے تیار رہنے کی ہدایت دیتے ہوئے عوام کو سفر سے قبل گاڑی کے انجن کا پانی اور ٹائروں کا پریشر چیک کرنے کا مشورہ دیا ہے۔ ایمرجنسی کی صورت میں عوام پی ڈی ایم اے کی ہیلپ لائن 1700 پر رابطہ کر سکتے ہیں، جبکہ ایمرجنسی آپریشن سنٹر مکمل فعال ہے۔
— پی ڈی ایم اے میڈیا سیل
