خیبرپختونخوا کے بیشتر اضلاع میں آج شام سے یکم جولائی تک شدید بارشوں کی پیشگوئی کی گئی ہے۔ صوبے کے بعض علاقوں میں موسلادھار بارش اور ژالہ باری کا بھی امکان ظاہر کیا گیا ہے۔ پی ڈی ایم اے کے مطابق بارشوں کے باعث صوبے کے شمالی علاقہ جات میں موجود گلیشیئرز کے پھٹنے کا خدشہ ہے، جس کے پیش نظر ضلعی انتظامیہ کو پیشگی اقدامات کی ہدایت کی گئی ہے۔
پی ڈی ایم اے نے چترال اپر، چترال لوئر، دیر اپر، سوات اور کوہستان کو حساس اضلاع قرار دیتے ہوئے وہاں کی ضلعی انتظامیہ کو فوری طور پر الرٹ رہنے کی ہدایت جاری کی ہے۔ کسی بھی ناخوشگوار واقعے سے نمٹنے کے لیے متعلقہ انتظامیہ کو پیشگی اقدامات اٹھانے اور حساس علاقوں کی مقامی آبادی کو بروقت الرٹ کرنے کی ہدایت کی گئی ہے۔
ادارے کے مطابق ایمرجنسی سروسز اور ریسکیو اہلکاروں کو ہائی الرٹ رہنے، ہنگامی سامان اور دستیاب وسائل کو پہلے سے تیار رکھنے کی بھی ہدایت دی گئی ہے۔ سیاحوں کو غیر ضروری سفر سے گریز کرنے اور احتیاطی تدابیر اختیار کرنے کی تلقین کی گئی ہے تاکہ کسی بھی ممکنہ حادثے سے بچا جا سکے۔
پی ڈی ایم اے کا ایمرجنسی آپریشن سنٹر مکمل طور پر فعال ہے، ترجمان نے عوام سے اپیل کی ہے کہ کسی بھی ناخوشگوار واقعے کی اطلاع فوری طور پر 1700 پر دی جائے۔
