گورنر ہاؤس پشاور میں خیبر پختونخوا کی وسط ایشیائی ممالک اور پڑوسی ریاستوں تک تجارتی استعداد کو فروغ دینے سے متعلق ایک اہم کانفرنس کا انعقاد کیا گیا۔
کانفرنس میں وسط ایشیائی ریاستوں کے سفراء، ایران اور افغانستان کے قونصل جنرلز، خیبر چیمبر آف کامرس کے صدر، TDAP کے ڈائریکٹر، جیمالوجیکل انسٹیٹیوٹ کے چیئرمین، یونائیٹڈ بزنس گروپ کے رہنما ایس ایم تنویر سمیت مختلف کاروباری شخصیات اور سفارتی نمائندوں نے شرکت کی۔
گورنر خیبرپختونخوا فیصل کریم کنڈی نے مہمان خصوصی کی حیثیت سے کانفرنس سے خطاب کیا اور شرکاء کو گورنر ہاؤس آمد پر خوش آمدید کہا۔
اپنے خطاب میں گورنر نے کانفرنس کے انعقاد پر خیبر چیمبر آف کامرس اور TDAP کو مبارکباد دی اور کہا کہ “آج کی کانفرنس خیبر پختونخوا کی اقتصادی ترقی کیلئے تجارتی راہداریوں کے مواقع پیدا کرنے کا ایک اہم سنگ میل ہے۔”
انہوں نے کہا کہ خیبرپختونخوا کا جغرافیائی محل وقوع اور سات سرحدی بارڈرز اسے تجارتی سرگرمیوں کیلئے خاص اہمیت دیتا ہے۔ انہوں نے کہا کہ “وسط ایشیائی ممالک تک تجارتی رسائی صرف خیبرپختونخوا ہی نہیں بلکہ پاکستان کے روشن مستقبل کی ضمانت ہے۔”
گورنر نے کہا کہ سرمایہ کاری اور تجارت کو فروغ دینے کے لیے حکومت پرعزم ہے اور تمام اداروں کو عملی اقدامات کرنا ہوں گے تاکہ تجارتی سہولیات میں بہتری لائی جا سکے۔
