صوبائی وزیر زراعت میجر ریٹائرڈ سجاد بارکوال نے کرک میں بیری شہد پروسیسنگ یونٹ اور انٹرنیشنل کوالٹی ٹیسٹنگ لیبارٹری کا افتتاح کر دیا۔ اس موقع پر صوبائی وزیر نے کہا کہ بیری شہد اپنی منفرد کوالٹی اور ذائقے کے باعث انٹرنیشنل سطح پر مشہور ہے اور اس صنعت کو مزید ترقی دے کر صوبے کی معیشت میں نمایاں اضافہ کیا جائے گا۔ انہوں نے بتایا کہ خیبرپختونخوا اس وقت 6 میٹرک ٹن شہد پیدا کر رہا ہے جس میں سے صرف کرک سے 3 میٹرک ٹن حاصل ہوتا ہے۔ ان کا کہنا تھا کہ صوبے میں دو پروسیسنگ پلانٹ نصب کیے جا چکے ہیں، ترناب کے بعد دوسرا پلانٹ کرک میں لگایا گیا ہے جس سے شہد کی پروسیسنگ اور معیار میں مزید بہتری آئے گی۔ صوبائی وزیر نے کہا کہ وزیراعلیٰ خیبرپختونخوا علی امین گنڈاپور کی ہدایت پر بانی پی ٹی آئی کے تمام پراجیکٹس مکمل کیے جائیں گے۔ ایک سال کے دوران زراعت میں انقلابی اقدامات اٹھائے گئے ہیں اور زمینداروں کے تعاون سے آئندہ سال کے اندر ترناب فارم سے بھی زیادہ پیداوار حاصل کی جائے گی۔