خیبرپختونخوا لیکروس ایسوسی ایشن کے زیراہتمام بونیر میں ٹریننگ کیمپ کاانعقاد

خیبرپختونخوا لیکروس ایسوسی ایشن کے زیراہتمام بونیر میں ٹریننگ کیمپ کاانعقاد کیاگیا جس میں ضلع بونیر کے پچاس سے زائد کھلاڑیوں کوکوالیفائیڈ کوچز کے زیراہتمام ٹریننگ دی گئی ، کیمپ کے اختتامی تقریب کے موقع پر میئر ڈگر بونیر سید سالار جہاں مہمان خصوصی تھے جنہوں نے کھلاڑیوں میں لیکروس کھیل کا سامان اور سرٹیفکیٹس تقسیم کئے ان کے ہمراہ پاکستان لیکروس فیڈریشن کے سیکرٹری طیفورزرین ،ڈی ایس او محمد فرحان،وقار الملک،ظفر اﷲ،امیر عالم، روزی ملک سمیت دیگر اہم شخصیات موجود تھیں ۔ صوبائی لیکروس ایسوسی ایشن کے زیر اہتمام ڈسٹرکٹ سپورٹس آفس بونیر کے باہمی اشتراک سے تحصیل گراﺅنڈ بونیر میں لیکروس کھیل کا ٹریننگ کیمپ کا شاندار انعقاد کیاگیا جس میں کثیر تعداد میں کھلاڑیوں نے ٹریننگ حاصل کی ۔ تربیتی سیشن کے بعد لیکروس میچ بھی کھیلاگیا جس میں کھلاڑیوں نے اپنی بھرپور صلاحیتوں کا مظاہرہ پیش کیا ۔ میئر سید سالار جہاں نے اپنے خطاب میں بونیر میں لیکروس کو ترقی دینے کے عزم کا اظہار کرتے ہوئے کمیونٹی کی ترقی اور نوجوانوں کی مصروفیت کو فروغ دینے میں کھیلوں کی اہمیت پر زور دیا۔ انہوں نے نوجوان ٹیلنٹ کو پروان چڑھانے اور کھلاڑیوں کو بہترین کارکردگی کے مواقع فراہم کرنے میں اس طرح کے ایونٹس کے کردار پر روشنی ڈالی۔صوبائی لیکروس ایسوسی ایشن نے ٹریننگ کیمپ کے کامیاب انعقاد پر تمام اسٹیک ہولڈرز کا تہہ دل سے شکریہ ادا کیا اور مستقبل میں اسی طرح کے اقدامات کے انعقاد کے لیے اپنے عزم کا اعادہ کیا۔