پشاور: خیبرپختونخوا کے وزیرِ ابتدائی و ثانوی تعلیم ارشد ایوب خان نے پشاور میں محکمہ تعلیم کے ای ٹرانسفر پالیسی سسٹم کا باضابطہ افتتاح کر دیا۔ افتتاحی تقریب میں سیکرٹری ایلیمنٹری اینڈ سیکنڈری ایجوکیشن محمد خالد، اسپیشل سیکرٹری ابتدائی و ثانوی تعلیم مسعود احمد، چیف پلاننگ ایجوکیشن آفیسر زین اللہ اور دیگر متعلقہ حکام نے شرکت کی۔
تقریب سے خطاب کرتے ہوئے وزیر تعلیم ارشد ایوب خان نے کہا کہ صوبائی حکومت نے ایک تاریخی قدم اٹھاتے ہوئے کامیاب ای ٹرانسفر پالیسی کو عملی شکل دی ہے، جس کے تحت اساتذہ کی خواہشات اور میرٹ کو مکمل طور پر یقینی بنایا گیا ہے۔ انہوں نے کہا کہ ماضی میں دو مرتبہ ای ٹرانسفر پالیسی متعارف کرائی گئی تھی تاہم اس میں مختلف خامیاں موجود تھیں، جنہیں اب دور کر دیا گیا ہے۔
وزیر تعلیم نے واضح کیا کہ ای ٹرانسفر پالیسی صوبے میں کامیابی سے جاری رہے گی اور پاکستان تحریک انصاف کے چیئرمین اور وزیر اعلیٰ کی ہدایات کی روشنی میں اسے مزید مؤثر اور بہتر بنایا جائے گا تاکہ تعلیمی شعبے کو جدید تقاضوں سے ہم آہنگ کیا جا سکے۔
انہوں نے مزید بتایا کہ ای ٹرانسفر پالیسی کے اگلے مرحلے میں ٹینور بیسڈ اور باہمی (میوچل) ٹرانسفر کے نظام کو بھی شامل کیا جائے گا، جس سے اساتذہ کو شفاف، منصفانہ اور آسان طریقے سے تبادلوں کی سہولت حاصل ہو سکے گی۔ صوبائی حکومت کے مطابق یہ نظام تعلیم میں شفافیت، نظم و ضبط اور اساتذہ کے مسائل کے حل میں اہم کردار ادا کرے گا۔
