اسلام آباد، 7 اپریل 2025
گورنر خیبرپختونخوا فیصل کریم کنڈی نے اسلام آباد پالیسی ریسرچ انسٹیٹیوٹ کے زیراہتمام “خیبرپختونخوا میں سیکیورٹی اور گورننس کے چیلنجز” کے موضوع پر منعقدہ سیمینار کے افتتاحی سیشن میں شرکت کی اور خطاب کیا۔
اس موقع پر اپنے خطاب میں گورنر نے کہا کہ صوبہ اس وقت دہشتگردی، گورننس کے خلا، اور معاشی بدحالی جیسے سنگین چیلنجز کا سامنا کر رہا ہے۔ انہوں نے مزید کہا کہ بدعنوانی اور سیاسی اونر شپ نہ لینا بھی خیبرپختونخوا کے مسائل میں شامل ہے۔ فیصل کریم کنڈی نے زور دیا کہ صوبے میں گورننس کا معیار بہتر بنانے کے لیے فنڈز کا شفاف استعمال انتہائی ضروری ہے۔ ان کا کہنا تھا کہ خیبرپختونخوا میں سیکیورٹی فورسز نے بڑی قربانیاں دے کر امن بحال کیا ہے، لیکن خطرات اب بھی مکمل طور پر ختم نہیں ہوئے۔
گورنر خیبرپختونخوا نے کہا کہ فاٹا انضمام کے بعد ضم اضلاع میں حکمرانی کا خلا، بارڈر پر جرائم کی سرگرمیاں، اور بدعنوانی جیسے عوامل اب بھی شدت کے ساتھ موجود ہیں۔ انہوں نے واضح کیا کہ سرحدی علاقوں میں مؤثر انتظامات، بین الاداراہی ہم آہنگی، اور پائیدار پالیسی سازی ناگزیر ہو چکی ہے۔ گورنر نے اس بات پر بھی افسوس کا اظہار کیا کہ گزشتہ دہائی میں خیبرپختونخوا میں ترقیاتی فنڈز کا غلط استعمال ہوا، جبکہ قانون سازی کے باوجود خاطرخواہ نتائج حاصل نہ ہو سکے۔ ان کا کہنا تھا کہ بہترین گورننس کے لیے پبلک اکاؤنٹس کمیٹیوں کو مزید مؤثر بنانا ہوگا، آڈٹ رپورٹس پر کھلی سماعتوں کا انعقاد کرنا ہوگا، اور حکومتی احتساب کے بہتر نظام کو اپنانا ہوگا۔ فیصل کریم کنڈی نے اختتام پر کہا کہ جب تک مالیاتی نظم و نسق اور شفافیت کو یقینی نہیں بنایا جائے گا، اچھی حکمرانی کا خواب شرمندۂ تعبیر نہیں ہو سکتا۔
