پشاور: خیبر پختونخوا میں سرد موسم اور دھند کی شدت کے پیش نظر صوبائی حکومت نے تمام سرکاری اور نجی تعلیمی اداروں کے لیے نیا اوقات کار جاری کر دیا ہے۔ حکام کے مطابق مردان، چارسدہ، نوشہرہ اور صوابی میں اسکول صبح 9 بجے کھلیں گے۔
جاری کردہ شیڈول میں بتایا گیا ہے کہ موسم کی شدت کے باعث کلاسوں کے دورانیے میں 5 منٹ کمی کی جا سکے گی تاکہ طلبہ کی سہولت اور حفاظت یقینی بنائی جائے۔
اعلامیہ کے مطابق دھند کے مکمل خاتمے تک نیا ٹائم ٹیبل نافذ العمل رہے گا، اور تمام سرکاری و نجی اسکولوں کو ہدایت کی گئی ہے کہ وہ اس کی سختی سے پابندی کریں۔
ایجوکیشن ڈائریکٹوریٹ نے اس فیصلے کا نوٹیفکیشن متعلقہ اضلاع کو ارسال کر دیا ہے، جبکہ اسکولوں کے سربراہان کو ہدایت دی گئی ہے کہ نئے شیڈول پر عمل درآمد ہر صورت یقینی بنایا جائے۔
صوبائی حکومت کا کہنا ہے کہ یہ فیصلہ طلبہ کے تحفظ اور محفوظ تعلیمی ماحول کو برقرار رکھنے کے پیش نظر کیا گیا ہے، تاکہ موسم کی خرابی کے باوجود تعلیمی سرگرمیاں بغیر کسی رکاوٹ کے جاری رہ سکیں۔
