خیبر پختونخوا انڈر 21 گیمز 2026 میں ضلع اپر اور لوئر چترال سے تعلق رکھنے والے کھلاڑیوں نے شاندار کارکردگی کا مظاہرہ کرتے ہوئے صوبے بھر میں اپنی صلاحیتوں کا لوہا منوا لیا۔ ایتھلیٹکس کے مقابلوں میں انڈر21 ویمن ایتھلیٹکس کیٹیگری میں ملاکنڈ ریجن نے چیمپئن بننے کا اعزاز حاصل کیا۔ اس شاندار کامیابی میں مس سیدا انمول (چوئنج)، مہک مسکان (پرکوسپ) اور مہک (موغ، گرم چشمہ) نے غیر معمولی کارکردگی کا مظاہرہ کرتے ہوئے ملاکنڈ ریجن کے لیے گولڈ میڈلز اپنے نام کیے۔
اسی طرح خواتین فٹسال کے مقابلوں میں بھی ملاکنڈ ریجن نے شاندار کھیل پیش کرتے ہوئے چیمپئن شپ جیت لی۔ اس ایونٹ میں مس مشودہ (بونی)، طیبہ (پراوک)، ثنا (پراوک)، عشرت سہیل (بونی)، اعراج ذوہیب (بونی)، علیزہ (بونی) اور عریشہ جبار (بونی) نے نمایاں کارکردگی دکھاتے ہوئے گولڈ میڈلز حاصل کیے۔ مزید برآں مردوں کے فٹبال مقابلوں میں بھی ملاکنڈ ریجن نے چیمپئن ٹرافی اپنے نام کی۔ اس کامیابی میں عارف اللہ، سہیل، ابو بکر اور منصور نے بہترین کھیل پیش کرتے ہوئے خیبر پختونخوا فٹبال چیمپئن شپ 2026 کے ابھرتے ہوئے ستاروں کے طور پر اپنی شناخت قائم کی۔ ڈپٹی کمشنر اپر چترال محمد عمران خان نے انڈر 21 گیمز 2026 میں شاندار کارکردگی کا مظاہرہ کرنے والے تمام کھلاڑیوں کو دل کی گہرائیوں سے مبارکباد پیش کی۔ انہوں نے کہا کہ چترال کے نوجوان کھلاڑیوں نے اپنی محنت، لگن اور صلاحیتوں سے نہ صرف ضلع بلکہ پورے ملاکنڈ ریجن کا نام روشن کیا ہے۔ ڈپٹی کمشنر نے اس عزم کا اظہار کیا کہ ضلعی انتظامیہ مستقبل میں بھی نوجوانوں کو کھیلوں کے میدان میں آگے بڑھنے کے لیے ہر ممکن تعاون فراہم کرتی رہے گی۔ چترال کے ان نوجوان کھلاڑیوں کی یہ شاندار کامیابیاں نہ صرف ضلع بلکہ پورے ملاکنڈ ریجن کے لیے فخر کا باعث ہیں اور اس بات کا ثبوت ہیں کہ چترال کے نوجوان کھیلوں کے میدان میں ایک روشن مستقبل رکھتے ہیں۔