مردان: ڈی پی او آفس مردان میں پولیس افسران و جوانوں کے مسائل کے حل اور ان کی فلاح و بہبود کے پیش نظر اردلی روم کا انعقاد کیا گیا۔ اس موقع پر ڈی پی او مردان ظہور بابر آفریدی نے خود پولیس اہلکاروں سے فرداً فرداً ملاقات کی اور ان کے مسائل و مشکلات بغور سنے۔ اردلی روم کے دوران اہلکاروں نے تبادلوں، ترقی، ڈیوٹی نظام، چھٹیوں اور دیگر انتظامی امور سے متعلق اپنے مسائل پیش کیے، جن پر ڈی پی او مردان نے موقع پر ہی متعدد درخواستوں پر احکامات جاری کیے جبکہ باقی درخواستوں کو جلد از جلد حل کرنے کی یقین دہانی کرائی۔ ڈی پی او مردان نے کہا کہ، “پولیس فورس کی کارکردگی کا انحصار اس کے اہلکاروں کی ذہنی و پیشہ ورانہ آسودگی پر ہے، اور اسی مقصد کے تحت ہم اردلی روم کے ذریعے ان کے مسائل براہ راست سن کر حل کرنے کی کوشش کر رہے ہیں۔” انہوں نے مزید کہا کہ ایک مضبوط اور منظم فورس کی تشکیل کے لیے ضروری ہے کہ افسران اور جوانوں کو درپیش مسائل فوری طور پر حل کیے جائیں تاکہ وہ مکمل اطمینان کے ساتھ عوام کی خدمت سرانجام دے سکیں۔
