گورنر خیبرپختونخوا فیصل کریم کنڈی کی زیرصدارت پاک آسٹریا فحشولے انسٹیٹیوٹ آف اپلائیڈ سائنسز اینڈ ٹیکنالوجی ہری پور کا اجلاس منعقد ہوا۔ اجلاس میں ریکٹر ڈاکٹر محمدمجاہد،پراجیکٹ ڈائریکٹر ڈاکٹر ناصر علی خان نے یونیورسٹی کی مجموعی کارکردگی رپورٹ پیش کی۔ گورنر کو ادارہ کے بورڈ آف گورنرز کے ڈھانچہ، اراکین کے انتخاب سے متعلق بھی آگاہ کیا گیا۔ گورنر کو ادارہ کے اندر مستقبل قریب میں اسکول آف میڈیسن، ڈینٹسٹری اینڈ الائیڈ سائینسز کے آغاز سے متعلق بھی آگاہ کیا گیا۔ یونیورسٹی میں جرمنی، آسٹریا، چائینہ سمیت دیگر ممالک کیساتھ شراکتی فنی تعلیم کی ڈگری فراہم کی جاتی ہے۔
ادارہ میں اس وقت آرٹیفیشیل انٹیلیجنس، ریلوے ٹیکنالوجی، مکینیکل انجنئیرنگ سمیت اپلائیڈ سائینسز میں 4 ہزار سے زائد طلبہ زیر تعلیم ہیں۔ ادارہ کے 56 طلبہ جرمنی، چائینہ، آسٹریا سمیت دیگر شراکتی ممالک میں اسکالر شپس پر تعلیم حاصل کر رہےہیں۔ یونیورسٹی فیکلٹی کی ادارہ جاتی پیشہ ورانہ تربیت کیلئے شراکتی ممالک بجھوایا جاتا ہے۔ یونیورسٹی میں ٹیکنالوجی پارک کا قیام بھی عمل میں لایا گیا ہے۔ فحشولے یونیورسٹی کا جدید ٹیکنالوجی کی تعلیم سے متعلق ایک بہترین نظام ہے۔ جدید ٹیکنالوجی کی تعلیم کے ساتھ صنعتوں میں تربیتی عمل وقت کی ضرورت ہے۔ آسٹریا سمیت دیگر ممالک میں اساتذہ اور طلباء وطالبات کے تبادلے سے بلاشبہ یہاں کے طلباء و طالبات کو تعلیمی و عملی میدان میں کامیابیاں حاصل ہوں گی۔ ہنرمنداور دور حاضر کے جدید ٹیکنالوجی سے طلبہ کو لیس کر کے انکا مستقبل تابناک بنایاجاتا ہے۔
