پشاور: وزیر اعلیٰ خیبر پختونخوا محمد سہیل آفریدی سے مئی 2025 میں بھارت کے بزدلانہ حملے کے دوران خیبر پختونخوا سے تعلق رکھنے والے فورسز کے شہداء کے ورثاء نے ملاقات کی۔ اس موقع پر وزیر اعلیٰ نے شہداء کے اہل خانہ سے اظہارِ ہمدردی کیا اور ان کی قربانیوں کو قوم کا عظیم اثاثہ قرار دیا۔
وزیر اعلیٰ نے کہا کہ خیبر پختونخوا حکومت شہداء کے اہل خانہ کے ساتھ ہر قدم پر مکمل تعاون کے ساتھ شانہ بشانہ کھڑی ہے اور ان کی فلاح و بہبود حکومت کی اولین ترجیح ہے۔ انہوں نے اعلان کیا کہ کابینہ سے منظور شدہ شہداء کے ورثاء کے لیے 50 لاکھ روپے کی امدادی رقم میں مزید 50 لاکھ روپے کا اضافہ کیا جا رہا ہے۔
اس کے علاوہ وزیر اعلیٰ نے جنگ میں زخمی ہونے والے خیبر پختونخوا کے اہلکاروں کے لیے امدادی رقم 10 لاکھ روپے سے بڑھا کر 25 لاکھ روپے کرنے کا بھی اعلان کیا۔
وزیر اعلیٰ سہیل آفریدی نے کہا کہ خیبر پختونخوا کے عوام کی لازوال قربانیاں ملک و قوم کی سلامتی کی ضمانت ہیں۔ انہوں نے کہا کہ حق کی راہ میں شہید کبھی نہیں مرتے اور شہادت مسلمان کے لیے سب سے اعلیٰ اور مثالی موت ہے۔
انہوں نے اس عزم کا اعادہ کیا کہ شہداء ہمارا فخر ہیں اور خیبر پختونخوا حکومت ان کے ورثاء کا بھرپور خیال رکھتی رہے گی۔
