پاکستان ایئر فورس کے محمد عماد نے جہانگیر خان سکواش سیریز اپنے نام کرلی

خیبرپختونخوا سے تعلق رکھنے والے پاکستان ایئرفورس کے محمد عماد گل نے جہانگیر خان سیٹلائٹ سکواش سیریز اپنے نام کرلی ، فائنل میں محمد عماد نے پنجاب کے سخی اﷲ کو تین ایک سے شکست دی ، پاکستان نیوی کے زیراہتمام روشن خان جہانگیر خان اسکواش کمپلیکس میںمنعقدہ فائنل میں پاکستان ائیر فورس کے محمد عماد گل نے بہترین کھیل کا مظاہرہ کرتے ہوئے پنجاب کے سخی اللہ کوایک کے مقابلے تین گیمز سے شکست دیکرفاتح ہونے کا اعزاز حاصل کیا۔عماد کا سکور گیارہ تین ، گیارہ چھ ، سات گیارہ اور گیارہ آٹھ رہا ، ٹورنامنٹ چار دن تک جاری رہا جس کے مہمان خصوصی سابق ورلڈ چیمپئن جہانگیر خان نے فاتح کھلاڑیوں میں انعامات تقسیم کئے۔ محمد عماد نے پہلے راﺅنڈ میں پنجاب کے شعیب خان کو تین صفر دوسرے راﺅنڈ میںکراچی کے نوید رحمان کو تین صفر ، کواٹر فائنل میںپنجاب کے اذلان کو تین صفر جبکہ سیمی فائنل میں پاکستان آرمی کے صدام الحق کو تین صفر سے شکست دیکر فائنل کھیلنے کا اعزاز حاصل کیا اس سے قبل محمد عماد گل نے مختلف نیشنل اور انٹر نیشنل ٹائٹلز اپنے نام کئے ایشین جونیئر سکواش چیمپئن شپ میں براﺅنڈ میڈل جیتا جبکہ ورلڈ جونیئر سکواش چیمپئن شپ میں ٹیم ایونٹ کے کواٹر فائنل تک رسائی حاصل کی ۔ محمد عماد کی کامیابی میں ان کے کوچ طاہر اقبال کا اہم رول ہے جنہوں نے ان کے ساتھ بھرپور محنت کی محمد عماد نے اپنی کامیابی پر اپنے کوچز اور خیبرپختونخوا سکواش ایسوسی ایشن کے صدر قمرزمان کا بھی شکریہ ادا کیا جن کی بدولت آج وہ اس مقام پر ہے ۔