پاک فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف نے کہا ہے کہ گزشتہ رات بھارت کی جانب سے پاکستان کے مختلف شہروں اور آزاد کشمیر میں چھ مقامات پر حملے کیے گئے، جن کے نتیجے میں 26 افراد شہید اور 46 زخمی ہو گئے۔
ترجمان کے مطابق ان حملوں کا سب سے سنگین واقعہ احمد پور شرقیہ میں پیش آیا، جہاں ایک مسجد پر بمباری کے باعث 13 افراد جاں بحق ہوئے، جن میں دو کمسن بچیاں، خواتین اور مرد شامل تھے جبکہ متعدد زخمی بھی ہوئے۔ آزاد کشمیر کے علاقے مظفر آباد کے قریب ایک اور مسجد پر حملے میں تین شہری شہید جبکہ دو بچے زخمی ہوئے۔ کوٹلی، مریدکے اور شکرگڑھ میں بھی عبادت گاہوں کو نشانہ بنایا گیا، جن میں متعدد افراد کی جانیں گئیں یا وہ زخمی ہوئے۔
ترجمان نے بتایا کہ لائن آف کنٹرول پر بلااشتعال گولہ باری کے باعث پانچ مزید شہریوں کی جانیں گئیں، جن میں ایک پانچ سالہ بچہ بھی شامل ہے۔ پاک فوج کے مطابق، بھارت کی اس اشتعال انگیزی کا فوری اور موثر جواب دیا گیا۔ پاکستانی فضائیہ نے ردعمل میں پانچ بھارتی جنگی طیارے اور ایک ڈرون مار گرائے۔ ترجمان نے واضح کیا کہ پاکستان نے صرف ان طیاروں کو نشانہ بنایا جو براہ راست پاکستانی حدود اور شہریوں کو نشانہ بنا رہے تھے۔
انہوں نے مزید کہا کہ اگرچہ پاکستانی افواج کے پاس دشمن کو مزید بھاری نقصان پہنچانے کی صلاحیت موجود تھی، تاہم پاکستان نے تحمل اور ذمہ داری کا مظاہرہ کرتے ہوئے محدود ردعمل دیا۔ ترجمان کے مطابق، حملوں میں مساجد کو نشانہ بنانا بھارتی حکومت کی متعصبانہ پالیسیوں کی عکاسی کرتا ہے، اور یہ واضح ہے کہ ایسے حملے مذہبی آزادی پر سنگین حملہ ہیں۔ ترجمان کا کہنا تھا کہ جن مقامات کو نشانہ بنایا گیا، وہ پہلے ہی مقامی اور غیر ملکی میڈیا کی رسائی میں تھے اور وہاں کسی مشتبہ سرگرمی کے شواہد موجود نہیں تھے۔
انہوں نے بتایا کہ پاکستان کی دفاعی صلاحیت مکمل طور پر محفوظ ہے اور کسی بھی مستقبل کے اقدام کا بھرپور جواب دینے کے لیے مکمل طور پر تیار ہے۔
