ضلع سوات میں 26 مئی سے 30 مئی تک پولیو سے بچاؤ کی قومی مہم کا آغاز کیا جائے گا۔ اس حوالے سے ڈپٹی کمشنر سوات شہزاد محبوب کی زیر صدارت ضلعی انسداد پولیو کمیٹی اور ای پی آئی ٹاسک فورس کا اجلاس منعقد ہوا، جس میں پانچ روزہ مہم کے انتظامات کا تفصیلی جائزہ لیا گیا۔
اجلاس میں تمام اسسٹنٹ کمشنرز (بذریعہ ویڈیو لنک)، ڈسٹرکٹ ہیلتھ آفیسر، ای پی آئی کوآرڈینیٹر، این سٹاپ آفیسر، محکمہ تعلیم، صحت، پولیس اور دیگر متعلقہ محکموں کے نمائندوں نے شرکت کی۔ اجلاس کے دوران این سٹاپ آفیسر ڈاکٹر انور جمال نے پولیو مہم سے متعلق بریفنگ دی اور مہم کے مختلف پہلوؤں پر روشنی ڈالی۔
مہم کے دوران بچوں کو گھروں میں جا کر پولیو سے بچاؤ کے قطرے فراہم کیے جائیں گے۔ اس مقصد کے لیے طبی عملہ، انتظامی افسران اور متعلقہ ٹیمیں تشکیل دی گئی ہیں جو مکمل نظم و ضبط کے ساتھ مہم کو کامیاب بنانے میں اپنا کردار ادا کریں گی۔ ضلعی اور یونین کونسل سطح پر بھی مؤثر نگرانی کے انتظامات کیے گئے ہیں تاکہ مہم کی شفافیت اور کارکردگی کو یقینی بنایا جا سکے۔
ڈپٹی کمشنر سوات شہزاد محبوب نے اجلاس سے خطاب کرتے ہوئے عوام سے اپیل کی کہ وہ پانچ سال سے کم عمر بچوں کو پولیو سے بچاؤ کے قطرے ضرور پلائیں۔ انہوں نے کہا کہ شہری پولیو ٹیموں سے بھرپور تعاون کریں اور بطور ذمہ دار فرد، اس خطرناک مرض کے خاتمے میں حکومت کا ساتھ دیں۔
