پشاوراہلِ غزہ سے اظہارِ یکجہتی کیلئے 26 اپریل کو ملک گیر شٹر ڈاؤن ہڑتال کے سلسلے میں پاکستان بزنس فورم کے نمائندہ وفد نے سرحد چیمبر آف کامرس میں بزنس مین گروپ کے لیڈر غضنفر بلور سے ملاقات کی۔ وفد کی قیادت پاکستان بزنس فورم کے مرکزی نائب صدر خالد محمود، ضلعی صدر خالد گل مہمند، نائب صدور حاجی سیف اللہ، مشتاق خلیل اور محمد وقاص نے کی۔ اس موقع پر وفد نے غضنفر بلور کو 24 اپریل کو ہونے والے آل تاجر غزہ جرگہ میں شرکت کی دعوت دی اور 26 اپریل کو ملک گیر شٹر ڈاؤن ہڑتال کی مکمل یقین دہانی کرائی۔ پاکستان بزنس فورم کی جانب سے واضح کیا گیا کہ تاجر برادری فلسطینی عوام کے ساتھ ہر ممکنہ یکجہتی کے اظہار کے لیے پرعزم ہے اور غزہ کے مظلوم عوام کی آواز بلند کرنے کیلئے ہر سطح پر اپنا کردار ادا کرے گی۔