کوہاٹ کے علاقے ڈھوڈہ چوک پر مضافاتی علاقوں کے عوام نے احتجاجی مظاہرہ کیا۔ مظاہرین نے مین ہائی وے کو ٹریفک کے لئے بند کرکے اپنا احتجاج ریکارڈ کرایا۔ مظاہرین کا کہنا تھا کہ ڈھوڈہ چوک شہر کا مصروف ترین مقام ہے جہاں آئے روز حادثات ہوتے ہیں، مگر عوامی نمائندے وعدے کرنے کے باوجود مسائل حل نہیں کرتے۔ ان کے مطابق موجودہ ایم این اے اور ایم پی اے نے فلائی اوور کی تعمیر کا وعدہ کیا تھا تاکہ عوام حادثات سے محفوظ رہ سکیں، لیکن یہ وعدہ اب تک پورا نہیں کیا گیا۔ مظاہرین نے الزام لگایا کہ عوامی نمائندے فوٹو سیشن تک محدود رہتے ہیں اور عملی اقدامات نہیں کرتے۔ اس موقع پر وزیر قانون خیبرپختونخوا آفتاب عالم اور ایم پی اے داود آفریدی مظاہرین سے مذاکرات کے لیے پہنچے اور فلائی اوور کی تعمیر کا وعدہ کیا۔ حکومتی یقین دہانی کے بعد مظاہرین نے احتجاج ختم کرتے ہوئے روڈ کو ٹریفک کے لیے کھول دیا۔