کیپٹل سٹی پولیس پشاور نے رمضان المبارک کے دوران امن و امان برقرار رکھنے اور شہریوں کے جان و مال کے تحفظ کے لیے خصوصی سکیورٹی پلان ترتیب دے دیا ہے۔ اس حوالے سے سی سی پی او پشاور ڈاکٹر میاں سعید احمد کی زیر صدارت ملک سعد شہید پولیس لائن میں اعلیٰ سطح اجلاس منعقد ہوا، جس میں چیف ٹریفک آفیسر ڈاکٹر زاہد اللہ، ایس ایس پی آپریشنز فرحان خان، ایس ایس پی انوسٹی گیشن عائشہ گل، ایس ایس پی کوآرڈی نیشن خالد خان، ایس پی ہیڈکوارٹر علی گوہر خان سمیت ڈویژنل ایس پیز اور ایس ڈی پی اوز نے شرکت کی۔
اجلاس میں رمضان المبارک کے دوران سکیورٹی اور ٹریفک انتظامات کو مزید مؤثر بنانے کے لیے اہم فیصلے کیے گئے، جن میں حساس مقامات اور عبادت گاہوں کا سکیورٹی آڈٹ، افطاری، تراویح اور سحری کے اوقات میں پولیس گشت میں اضافہ، تجارتی مراکز میں لیڈیز پولیس کی تعیناتی، پیدل گشت اور خصوصی ناکہ بندیوں کو مضبوط بنانا شامل ہے۔ مزید برآں سرچ اینڈ سٹرائیک آپریشنز میں وسعت دینے اور ہوائی فائرنگ و غیر قانونی اسلحہ کے خلاف زیرو ٹالرنس پالیسی پر سختی سے عمل درآمد کا فیصلہ بھی کیا گیا ہے۔
پولیس حکام کے مطابق رمضان المبارک کے دوران رش والے علاقوں اور گنجان بازاروں میں اضافی نفری تعینات کی جائے گی، جبکہ بکتر بند گاڑیاں، ابابیل اسکواڈ، سٹی پٹرولنگ فورس اور اسپیشل رائیڈرز اسکواڈز حساس مقامات پر ہمہ وقت گشت کریں گے۔ سی سی پی او ڈاکٹر میاں سعید احمد نے کہا کہ پشاور پولیس عوام کے جان و مال کے تحفظ کے لیے تمام دستیاب وسائل بروئے کار لا رہی ہے، اور رمضان المبارک کے دوران شہریوں کو محفوظ ماحول فراہم کرنا اولین ترجیح ہے۔
