سابق صدر آصف علی زرداری نے انکشاف کیا ہے کہ تاجکستان سے بلوچستان کے لیے چترال کے راستے پانی لانے کا منصوبہ تیار کرلیا گیا ہے۔ اس منصوبے کی فزیبیلٹی رپورٹ پر متحدہ عرب امارات نے سرمایہ کاری کی ہے، جبکہ یہ رپورٹ چین کو بھی فراہم کی گئی ہے۔ اسلام آباد میں منعقدہ بین الاقوامی کانفرنس کے اختتامی سیشن سے خطاب کرتے ہوئے آصف علی زرداری نے کہا کہ “مجھے امید ہے کہ چین بھی اس رپورٹ کا جائزہ لے گا۔” انہوں نے کہا کہ حالات اتنے مشکل نہیں جتنے سمجھے جا رہے ہیں، اور ہمیں چترال کے راستے بلوچستان تک پانی لانا ہے۔
کانفرنس کا موضوع “علاقائی روابط اور پاکستان کے ابھرتے ہوئے مواقع” تھا، جس میں مختلف ممالک کے نمائندوں نے شرکت کی۔ یہ منصوبہ پاکستان میں پانی کے بحران کو حل کرنے کے حوالے سے ایک اہم پیش رفت قرار دی جا رہی ہے۔ اگر یہ منصوبہ عملی شکل اختیار کرتا ہے تو بلوچستان کے پانی کی کمی کے مسائل میں خاطر خواہ کمی آسکتی ہے۔
