صوبائی حکومت خیبرپختونخوا کی ہدایات اور ڈپٹی کمشنر ہنگو جناب گوہر زمان وزیر کی رہنمائی میں اسسٹنٹ کمشنر (ہیڈکوارٹر) ہنگو جناب اسفندیار خالد کی زیر قیادت مون سون شجرکاری مہم 2025 کے تحت ڈسٹرکٹ ہیڈکوارٹر ہسپتال ہنگو میں شجرکاری مہم کا کامیاب انعقاد کیا گیا۔
تقریب میں تحصیل چیئرمین جناب عامر غنی اور میڈیکل سپرنٹنڈنٹ ڈی ایچ کیو ہسپتال کی شرکت نے مہم کی اہمیت کو اجاگر کیا۔ شجرکاری کے دوران درجنوں پودے ہسپتال کے احاطے میں لگائے گئے تاکہ نہ صرف ہسپتال کے ماحول کو خوشگوار اور سرسبز بنایا جا سکے بلکہ شہریوں کو صحت مند فضا بھی میسر آ سکے۔
اس مہم میں محکمہ جنگلات کی ٹیم نے بھرپور تعاون فراہم کیا اور خصوصی طور پر امرود کے پودے مہیا کیے۔ ان کی شرکت اور خدمات کو ضلعی انتظامیہ اور شہری حلقوں کی جانب سے سراہا گیا۔
اس موقع پر مقررین نے کہا کہ درخت لگانا صرف ایک ماحولیاتی فریضہ نہیں بلکہ آئندہ نسلوں کے لیے ایک قیمتی تحفہ ہے۔ مون سون شجرکاری مہم کے تحت مزید علاقوں میں بھی شجرکاری کی منصوبہ بندی کی جا رہی ہے۔
ضلعی انتظامیہ کی جانب سے عوام سے اپیل کی گئی کہ وہ اس مہم میں بھرپور شرکت کریں اور ہنگو کو ایک سرسبز اور خوشحال ضلع بنانے میں اپنا کردار ادا کریں۔
