چترال پولو گراؤنڈ میں جاری پری شندور پولو میچز نے شائقین کا جوش و خروش عروج پر پہنچا دیا ہے۔ تمام ٹیمیں اپنا ابتدائی مرحلہ مکمل کر چکی ہیں، اور اب مقابلے کوارٹر فائنل مرحلے میں داخل ہو گئے ہیں، جہاں چترال کی نامور اور روایتی ٹیمیں آمنے سامنے ہوں گی۔ خاص طور پر چترال لیویز اور چترال سکاؤٹس کے درمیان متوقع مقابلہ شائقین کی توجہ کا مرکز بنا ہوا ہے، جو اپنی مہارت اور روایات کی بدولت ہمیشہ سنسنی خیز مقابلہ پیش کرتے ہیں۔ اس کے علاوہ چترال کی کئی ممتاز سول ٹیمیں بھی بھرپور تیاری کے ساتھ میدان میں اتریں گی۔ گزشتہ روز ایک تکنیکی مسئلے کی وجہ سے ایک اہم میچ منسوخ کرنا پڑا۔ تاہم، چترال لیویز اور سکاؤٹس کے درمیان باہمی مشاورت سے مسئلے کا خوش اسلوبی سے حل نکالا گیا ہے۔ آج سے میچز دوبارہ اپنے شیڈول کے مطابق جاری رہیں گے، جس پر شائقین نے خوشی کا اظہار کیا ہے۔ ساتھ ہی ساتھ، شندور پولو فیسٹیول 2025 کی تیاریاں بھی زور و شور سے جاری ہیں، جو 20 سے 22 جون تک اپر چترال میں منعقد ہوگا۔ چترال کی ٹیمیں بھرپور تربیت اور جذبے کے ساتھ شریک ہوں گی، جہاں شائقین کو ایکشن، ثقافت، اور تفریح سے بھرپور ماحول ملے گا۔ “تو تیار رہیے، اور جوڑ لیجیے اپنا وقت ‘پولو’ کے نام! ” – شہزادہ سکندرالملک، صدر پولو ایسوسیشن چترال