ساحر ایسوسی ایٹس نے پریذیڈنٹ ٹرافی گریڈ ٹو ٹورنامنٹ جیت لیا۔ فائنل میں ایم آئی ٹی سلیوشنز کو 355 رنز سے شکست۔ ایبٹ آباد۔ساحر ایسوسی ایٹس نے پریذیڈنٹ ٹرافی گریڈ ٹو ٹورنامنٹ جیت لیا۔اس نے فائنل میں ایم آئی ٹی سلیوشنز کو 355 رنز کے بھاری مارجن سے شکست دے دی ۔ اس جیت کے ساتھ ہی ساحر ایسوسی ایٹس نے آئندہ سیزن میں پریذیڈنٹ ٹرافی گریڈ ون کے لیے بھی کوالیفائی کرلیا۔ایبٹ آباد اسٹیڈیم میں چار روزہ فائنل کے آخری دن ساحر ایسوسی ایٹس اپنی دوسری اننگز میں449 رنز بناکر آؤٹ ہوگئ ۔محسن خان 68 رنز بناکر آؤٹ ہوئے ۔کلیم اللہ نے83 رنز دے کر5 وکٹیں حاصل کیں۔ایم آئی ٹی سلیوشنز کو جیتنے کے لیے 75 اوورز میں 587 رنز کا ہدف ملا تھا لیکن پوری ٹیم 231 رنز بناکر آؤٹ ہوگئی۔ محمد بلال 70 اور حسنین ندیم 54 رنز کے ساتھ نمایاں رہے۔ خان زیب نے 73 رنز دے کر 5 وکٹیں حاصل کیں۔ ساحر ایسوسی ایٹس کے فہد عثمان پلیئر آف دی میچ قرار پائے۔پی اے ایف کے عتیق الرحمن ( 741 رنز اور 17 وکٹیں ) پلیئر آف دی ٹورنامنٹ قرار پائے۔ٹورنامنٹ کے بہترین بیٹر اور وکٹ کیپر کا ایوارڈ ساحر ایسوسی ایٹس کے عاصم علی ناصر( 786 رنز ) اور ( 28 کیچز اسٹمپڈ ) جبکہ بہترین بولر کا ایوارڈ ونگ 999 اسپورٹس کے محمد طارق خان نے ( 47 وکٹیں ) حاصل کیا۔ان کرکٹرز کو پچاس پچاس ہزار روپے کا کیش ایوارڈ دیا گیا۔