پشاور چیف ٹریفک آفیسر ہارون رشید خان کی زیر صدارت ٹریفک لائن باچا خان چوک میں “پہلے سلام پھر کلام ” کی پالیسی سے متعلق خصوصی اجلاس منعقد ہوا جس میں ایس پی ہیڈ کوارٹرز ارباب شفیع اللہ، ایس پی ٹاؤن زکاء اللہ، ایس پی کینٹ عبد الرحیم ، ایس پی سٹی نیاز محمد ،ڈی ایس پیز ، سٹی ٹریفک پولیس پشاور کے افسران اور وارڈنز نے کثیر تعداد میں شرکت کی۔ چیف ٹریفک آفیسر ہارون رشید خان نے سلام کلام کی پالیسی پر عملدرآمد کو یقینی بنانے کی ہدایت کرتے ہوئے کہا کہ ٹریفک وارڈنز اور اہلکار شہریوں کے ساتھ خوش اخلاقی سے پیش آئیں اور ٹریفک عملہ ڈسپلن پر خصوصی عمل پیرا رہے ٹرن آوٹ اور ٹائم کی پابندی کا خاص خیال رکھیں ۔
انہوں نے کہا کہ انسپکٹر جنرل آف پولیس ذوالفقار حمید اور چیف کیپیٹل پولیس قاسم علی خان کے ویژن کے مطابق سٹی ٹریفک پولیس پشاور کو پورے صوبے کیلئے رول ماڈل بنائینگے ۔ انہوں نے کہا کہ سٹی ٹریفک پولیس پشاور کے حکام اور اہلکار شہریوں اور تاجروں کو ٹریفک قوانین سے متعلق آگاہی دینے کا سلسلہ جاری رکھیں اور انہیں سفری سہولیات کی فراہمی سمیت ٹریفک قوانین پر عملدرآمد یقینی بنانے پر آمادہ کریں ۔
کہ سٹی ٹریفک پولیس پشاور کے اہلکار تجاوزات کے خلاف کی جانیوالی کارروائیوں کے بعد کلیئر کردہ ایریا پر چیک اینڈ بیلنس رکھیں تاکہ پھر کوئی تجاوزات قائم نہ کریں اور پلازوں میں پارکنگ کو یقینی بنائیں تاکہ شہری سڑک کنارے گاڑیاں نہ کھڑی کریں اور سڑکوں کی روانی متاثر نہ ہو ۔ انہوں نے مزید کہا کہ ٹریفک قوانین پر عملدرآمد سٹی ٹریفک پولیس پشاور کی اولین ترجیح ہے جس کو ہر صورت میں عملی جامہ پہنایا جائیگا۔ انہوں نے ٹریفک وارڈنز کو بھی ہدایت کی کہ وہ دوران سفر ڈرائیونگ اصولوں پر کاربند رہیں ۔ انہوں نے کہا کہ قانون سب کیلئے برابر ہے قانون سے کوئی بالاتر نہیں ٹریفک قوانین کی خلاف ورزی کے مرتکب افراد کیخلاف قانون کے مطابق کارروائی عمل میں جائیگی ۔
