چارسدہ – تھانہ پڑانگ کی حدود درب ماجوکے میں خطرناک اشتہاری ملزمان کی فائرنگ سے شہید ہونے والے کانسٹیبل فصیح الدین خان کی نمازِ جنازہ پولیس لائن چارسدہ میں سرکاری اعزاز کے ساتھ ادا کی گئی۔ نمازِ جنازہ میں ریجنل پولیس آفیسر مردان جواد قمر، ڈسٹرکٹ پولیس آفیسر چارسدہ محمد وقاص خان، ڈپٹی کمشنر چارسدہ ڈاکٹر عظمت اللہ خان، سرکل ایس ڈی پی اوز، ایس ایچ اوز، پولیس افسران اور جوانوں سمیت بڑی تعداد میں افراد نے شرکت کی۔ پولیس کے چاق و چوبند دستے نے شہید کو سلامی پیش کی، جبکہ افسران نے پھولوں کے گلدستے رکھ کر شہید کی عظیم قربانی کو خراجِ عقیدت پیش کیا۔ بعد ازاں شہید کا جسدِ خاکی ان کے آبائی گاؤں درگئی سرڈھیری روانہ کیا گیا۔ شہید اپنے پسماندگان میں تین بچے چھوڑ گئے ہیں۔ اس موقع پر آر پی او مردان جواد قمر نے کہا کہ شہید کانسٹیبل فصیح الدین خان کی قربانی رائیگاں نہیں جائے گی اور واقعے میں ملوث ملزمان کو جلد قانون کے کٹہرے میں لایا جائے گا۔ انہوں نے مزید کہا کہ شہداء پولیس فورس کا فخر ہیں اور ان کی لازوال قربانیوں کو ہمیشہ یاد رکھا جائے گا۔