چیف خطیب خیبر پختونخوا مولانا محمد طیب قریشی نے یومِ یکجہتی کشمیر (5 فروری) کے موقع پر اپنے خصوصی پیغام میں کہا ہے کہ عالمی انسانی حقوق کے ادارے، بالخصوص اقوامِ متحدہ، مقبوضہ کشمیر میں بھارتی فوج اور مودی حکومت کی جانب سے جاری مظالم پر خاموش تماشائی بنے ہوئے ہیں، حالانکہ ظلم کی بھی کوئی حد ہوتی ہے۔ انہوں نے کہا کہ کشمیری عوام سے ہمارا ایمان کا رشتہ ہے جو ہمیشہ قائم رہے گا، اور پاکستانی قوم کے دل آج بھی اپنے مظلوم کشمیری بہن بھائیوں کے ساتھ دھڑکتے ہیں۔ مولانا محمد طیب قریشی نے کہا کہ خیبر پختونخوا کے غیور عوام، علماء کرام اور اہلِ مدارس کشمیریوں کی ہر ممکن مدد اور حمایت جاری رکھیں گے۔ انہوں نے مزید کہا کہ انشاءاللہ وہ دن دور نہیں جب ہم پھر سے ایک ہوں گے اور کشمیر بنے گا پاکستان۔