مسلسل بارشوں کے نتیجے میں نوشہرہ اور چارسدہ کے دریاؤں اور ندی نالوں میں طغیانی آسکتی ہے، جس سے نشیبی علاقے متاثر ہو سکتے ہیں۔ بالائی علاقوں میں بارشوں سے پانی کے بہاؤ میں مزید اضافہ متوقع ہے۔ ڈپٹی کمشنر نوشہرہ عرفان اللہ محسود نے تمام متعلقہ اداروں بشمول ریسکیو 1122، ٹی ایم اے، سول ڈیفنس، پولیس، محکمہ صحت اور تعلیم کو الرٹ رہنے کی ہدایت کی ہے۔ ضلعی انتظامیہ نوشہرہ نے عوام، خاص طور پر دریا کنارے رہنے والوں سے اپیل کی ہے کہ وہ محتاط رہیں، دریا کے قریب جانے سے گریز کریں اور کسی بھی ہنگامی صورتحال میں فلڈ کنٹرول روم یا ریسکیو 1122 سے رابطہ کریں۔ ضلعی انتظامیہ چارسدہ نے بھی اسی نوعیت کی اپیل جاری کی ہے اور تمام پیشگی اقدامات مکمل کر لیے گئے ہیں۔