ایبٹ آباد (ویب ڈیسک) ٹریفک پولیس ایبٹ آباد نے ہیلمٹ کے استعمال کی اہمیت کو اجاگر کرنے اور شہریوں میں ٹریفک شعور بیدار کرنے کے لیے ایک خصوصی آگاہی پروگرام کا انعقاد کیا، جس کے دوران بڑی تعداد میں موٹر سائیکل سواروں میں مفت ہیلمٹ تقسیم کیے گئے۔
یہ تقریب ایبٹ آباد لاری اڈہ کے مقام پر پیٹرول پمپ ایسوسی ایشن کے اشتراک سے منعقد کی گئی۔ اس موقع پر ایس ایس پی ٹریفک قمر حیات خان، جنرل (ر) ایاز سلیم رانا، پیٹرول پمپ ایسوسی ایشن کے صدر راجہ راشد، سیٹھ شبیر حسین (شیل پمپ)، جاوید اقبال (پی ایس او پمپ حویلیاں)، ڈی ایس پی ٹریفک، انسپکٹر ٹریفک، مقامی صحافیوں اور شہریوں کی بڑی تعداد نے شرکت کی۔
تقریب کے دوران خطاب کرتے ہوئے ایس ایس پی ٹریفک قمر حیات خان نے کہا کہ اس پروگرام کا بنیادی مقصد عوام الناس کو ہیلمٹ کی اہمیت سے آگاہ کرنا اور اس کے فوائد سے روشناس کروانا ہے۔ اُن کا کہنا تھا کہ بدقسمتی سے موٹر سائیکل حادثات میں سب سے زیادہ جانی نقصان سر کی چوٹ کی وجہ سے ہوتا ہے، اور ہیلمٹ اس قسم کی چوٹوں سے بچاؤ کا مؤثر ذریعہ ہے۔
انہوں نے شہریوں سے اپیل کی کہ وہ اپنی اور دوسروں کی جان کی حفاظت کے لیے ہیلمٹ کے استعمال کو یقینی بنائیں۔ اُن کا مزید کہنا تھا کہ ٹریفک پولیس ایسے آگاہی پروگراموں کے ذریعے شہریوں میں روڈ سیفٹی کا شعور پیدا کرنے کے لیے پرعزم ہے، تاکہ حادثات کی شرح میں کمی لائی جا سکے۔
شہریوں نے بھی ٹریفک پولیس کی اس کاوش کو سراہتے ہوئے کہا کہ اس طرح کے اقدامات نہ صرف جانیں بچا سکتے ہیں بلکہ محفوظ اور ذمہ دارانہ سفر کو فروغ دینے میں بھی معاون ثابت ہوتے ہیں۔
