ملک میں کاروباری ترقی، خاص طور پر ایکسپورٹ کے شعبے کو مؤثر بنانے کے لیے جرمن تنظیم جی آئی زی (GIZ) اور فیڈریشن آف پاکستان چیمبرز آف کامرس اینڈ انڈسٹری (FPCCI) کے اشتراک سے پشاور میں ایک اہم تربیتی ورکشاپ کا انعقاد کیا گیا۔ ورکشاپ میں نئی کاروباری پالیسیوں، قوانین، اور ایکسپورٹ بڑھانے کے طریقوں پر تفصیلی تبادلہ خیال کیا گیا، جب کہ ریسپانسیبل بزنس ہیلپ ڈیسک (RBH) کو کاروباری طبقے کے لیے گیم چینجر قرار دیا گیا۔
ورکشاپ کا اہتمام جی آئی زی اور ایف پی سی سی آئی پشاور ریجن نے مشترکہ طور پر کیا، جس میں وویمن چیمبر پشاور، سرحد چیمبر آف کامرس اینڈ انڈسٹری، چارسدہ چیمبر اور کرم چیمبر سمیت متعدد کاروباری تنظیموں نے شرکت کی۔ خاص طور پر خواتین انٹرپرینیورز نے اس سیشن میں بھرپور دلچسپی کا مظاہرہ کرتے ہوئے اسے ایکسپورٹ کی ترقی کے لیے انتہائی مفید قرار دیا۔
جی آئی زی کی اکنامک کوآپریشن اینڈ پرائیویٹ سیکٹر ڈویلپمنٹ ایڈوائزر ثمن حسیب نے شرکاء سے خطاب کرتے ہوئے کہا کہ پاکستان اور جرمنی کے مابین ہونے والے معاہدوں کے تحت کاروباری افراد، خاص طور پر ایکسپورٹرز، کے لیے ریسپانسیبل بزنس ہیلپ ڈیسک کا قیام ایک بڑی سہولت ہے۔ انہوں نے کہا کہ اس ہیلپ ڈیسک کے ذریعے کاروباری افراد کو نہ صرف مقامی بلکہ عالمی سطح پر لاگو ہونے والے نئے قوانین کے بارے میں بروقت اور درست معلومات فراہم کی جاتی ہیں۔
ثمن حسیب کا کہنا تھا کہ “کوئٹہ کی مثال ہمارے سامنے ہے جہاں نوجوان خواتین چھوٹے پیمانے پر ایکسپورٹ میں متحرک کردار ادا کر رہی ہیں۔ ہمیں امید ہے کہ ملک کے دیگر شہروں اور صوبوں میں بھی خواتین آگے بڑھیں گی۔ جی آئی زی ان کی ہر ممکن معلوماتی اور اخلاقی معاونت فراہم کرے گا۔”
انہوں نے کاروباری برادری پر زور دیا کہ وہ RBH جیسے پلیٹ فارمز سے مکمل فائدہ اٹھائیں، تاکہ عالمی منڈی میں پاکستان کی ایکسپورٹ کو تقویت مل سکے اور ملکی معیشت مستحکم ہو۔
شرکاء کو RBH کے استعمال، اس کے فوائد، اور کاروباری اصلاحات سے متعلق عملی رہنمائی بھی فراہم کی گئی، جسے حاضرین نے سراہا اور اسے معلوماتی اور مفید قرار دیا۔ ورکشاپ کا اختتام سوال و جواب کے سیشن پر ہوا، جہاں شرکاء نے مختلف پہلوؤں پر دلچسپ سوالات کیے۔