خیبر پختونخواہ پبلک پروکیورمنٹ اتھارٹی کا ورلڈ بینک کے پراجیکٹ کے پی سپیڈ کے اشتراک سے ای پیڈز سافٹ ویئر اور کیپرا رولز سے آگاہی کے بارے میں ضلع ہری پور کے افسران کے لئے تربیتی ورکشاپ کا آغاز پاک آسٹریا فخشولے انسٹیوٹ ہری پور میں ہوگیا۔ تین روزہ ورکشاپ میں سی اینڈ ڈبلیو،اریگیشن، لوکل گورنمنٹ، ہیلتھ ڈیپارٹمنٹ، ہائیر ایجوکیشن ڈیپارٹمنٹ، پی ایچ ای ڈی، لائیو سٹاک ڈیپارٹمنٹ ایلیمنٹری ایجوکیشن، فوڈ، فشریزاور سپورٹس ڈیپارٹمنٹ اور یونیورسٹی کے متعلقہ افسران شرکت کر رہے ہیں۔
ورکشاپ کا مقصد کیپرا ایکٹ رولز، سوفٹ وئیر اور اس کے قواعد و ضوابط کے بارے میں آگاہی فراہم کرنا ہے۔تربیتی ورکشاپ کے افتتاحی سیشن میں ڈائریکٹر ڈاکٹر امان اللہ نے شرکاء کو ورکشاپ کے اغراض و مقاصد کے بارے میں بتاتے ہوئے کہا کہ اس تربیتی ورکشاپ سے صوبے کے مختلف محکموں کے افسران کو کیپرا کے قوائد ضوابط سے آگاہی حاصل ہوگی جبکہ نئے لانچ کردہ سافٹ ویئر کے استعمال کے طریقہ کار سے بھی روشناس کروایا جائے گا جس سے سرکاری اداروں میں خریداری میں شفافیت اور افسران کی استعداد کار میں اضافہ ہوگا۔
انہوں نے مزید کہا کہ کیپرا پروکیورمنٹ میں بہتری لانے کے لئے مزید اقدامات بھی اٹھائے گی۔تربیتی ورکشا پ میں شرکت کرنے والے افسران نے اس حوالے سے بات چیت کرتے ہوئے کہا کہ سافٹ ویئر آنے سے پروکیورمنٹ کے عمل میں آسانی کے ساتھ سرکاری اداروں میں خریداری کے عمل میں شفافیت پیدا ہوگی۔شرکاء نے تربیتی ورکشاپ کے انعقاد پر کیپرا کا شکریہ ادا کرتے ہوئے اسے خوش آئند قرار دیا اور اس طرح کی ورکشاپ کے تسلسل سے انعقاد پر زور دیا۔ ورکشاپ مزید دو روز تک جاری رہے گا۔
