سکواش کی دنیا میں ایک بار پھر پاکستان کا پرچم بلند کرنے والے نوجوان کھلاڑی نور زمان انڈر 23ورلڈ سکواش چیمپئن شپ جیت کرپشاور واپس پہنچ گئے۔ پشاور آمد پر ان کا پرتپاک اور شاندار استقبال کیا گیا، جس میں انکے دادا سکواش کے سابق عالمی چیمپئن قمرزمان،سابق صوبائی وزیر کھیل سید عاقل شاہ، ،سابق ورلڈ چمپئنز جان۔شیرخان اورمحب اللہ خان،اے آئی پی ایس کے جنرل سیکرٹری امجدعزیزملک،نیشنل سوسائٹی فار سپورٹس ڈویلپمنٹ کے ڈائریکٹر ملک ہدایت الحق،پاکستان سائیکلنگ فیڈریشن کے صدر سید اظہر علی شاہ، نثار احمد سمیت بڑی تعدادمیں کھلاڑیوں اور کھیلوں سے وابستہ شخصیات کی بڑی تعداد موجود تھی۔
نور زمان جیسے ہی پشاور پہنچے تو پی اے ایف سکواش کمپلیکس پشاور میں ان کے اعزاز میں ایک خصوصی تقریب کا انعقاد کیا گیا، جس میں سکواش کے عظیم لیجنڈز جان شیر خان اور قمر زمان نے خود ان کا استقبال کیا۔ نور زمان کو پھولوں کے ہار پہنائے گئے اور انہیں قومی ہیرو کا درجہ دیتے ہوئے خوبصورت الفاظ میں خراجِ تحسین پیش کیا گیا۔اس موقع پرمیڈیا سے گفتگو کرتے ہوئے نور زمان نے کہاکہ میں سب سے پہلے اللہ کا شکر ادا کرتا ہوں جس نے مجھے پاکستان کے لیے انڈر 23 چیمپئن بنانے کی توفیق دی۔ یہ صرف میری نہیں بلکہ پوری قوم کی کامیابی ہے۔ انہوں نے مزید کہا کہ محنت کے بغیر کچھ بھی ممکن نہیں اور وہ آئندہ ٹورنامنٹس میں بھی شاندار کارکردگی دکھانے کے لیے پرعزم ہیں۔
ورلڈ چمپئن نور زمان نے پاکستان سکواش فیڈریشن کا خصوصی شکریہ ادا کرتے ہوئے کہا کہ ان کے خاندان میں کئی سکواش چیمپئنز رہ چکے ہیں، جن کی رہنمائی اور سپورٹ نے ان کے کھیل کو نکھارا۔ ان کی جیت نہ صرف ایک انفرادی اعزاز ہے بلکہ پورے ملک کے لیے خوشی کا باعث بنی ہے، خاص طور پر ایسے وقت میں جب پاکستان کو بین الاقوامی سطح پر ایک نئی کامیابی کی اشد ضرورت تھی۔اس موقع پرنورزمان کےدادااور سابق عالمی چیمپئن قمر زمان نے کہا کہ نور زمان کی کامیابی نئے کھلاڑیوں کے لیے مشعلِ راہ ہے۔
قمرزمان نے میڈیا سے گفتگو میں کہا کہ تیس سال بعد پاکستان کو سکواش میں اتنی بڑی کامیابی ملی ہے، جو ہمارے لیے کسی نعمت سے کم نہیں۔تقریب سے دیگر مقررین نے خطاب کرتے ہوئے کہاکہ اس جیت کو ایک تاریخی لمحہ قرار دیا جا رہا ہے، جس سے نہ صرف کھیل کو نئی زندگی ملی ہے بلکہ نوجوان کھلاڑیوں میں ایک نیا جذبہ بھی پیدا ہوا ہے۔ ماہرین کا ماننا ہے کہ اگر حکومت، فیڈریشنزاور سابق چیمپئنز اسی طرح مل کر نوجوانوں کی حوصلہ افزائی کرتے رہے تو وہ دن دور نہیں جب پاکستان ایک بار پھر سکواش کا عالمی چیمپئن بنے گا۔ تقریب سے خطاب کرتے ہوئے سابق ورلڈچمپئن جان شیر خان نے بھی اس امید کا اظہار کیا کہ پاکستان کا سنہرا دور ایک بار پھر واپس آئے گا، بشرطیکہ نوجوان کھلاڑیوں کی بھرپور سرپرستی کی جائے۔
