زو پشاور نے بس سٹاپس کی معلومات گوگل میپس پر فراہم کرنے کا اجرا کر دیا
زوپشاور کے مسافر اب اپنے سفر کی بہتر منصوبہ بندی کر سکیں گے اور گوگل میپس کا استعمال کرتے ہوئے بآسانی اپنے قریب ترین زو بس سٹیشن کی نشاندہی کر سکیں گے۔
زو پشاور نے اعلان کیا ہے کہ بی آر ٹی سروس گوگل میپس کے ساتھ Integration مکمل کر لی ہے جس کی بدولت مسافر بآسانی اپنے قریب ترین زو سٹیشن کی نشاندہی کے ساتھ ساتھ اپنے سفر کی بہتر منصوبہ بندی کر سکیں گے۔
دنیا بھر کے شہروں میں گوگل میپس بڑے پیمانے پر سفری ہدایات حاصل کرنے کے لئے استعمال کیا جاتا ہے. دنیا میں زیادہ تر ماس ٹرانزٹ سسٹمز گوگل میپس کے ساتھ integrated ہیں جس کی وجہ سے سفری سہولیات اور مسافروں کی تعداد میں اضافہ بھی ہوا ہے۔
اس موقع پر ٹرانس پشاور کے چیف ایکزیکٹیو آفیسر فیاض احمد خان نے بتایا کہ’ گوگل میپس نے زو پشاور کے ساتھ integration کا فیصلہ، زو پشاور کی بہترین اور منظم سروس کی وجہ سے کیا اور بر وقت تعاون کیلئے ٹرانس پشاور گوگل کا مشکور ہے۔‘
انہوں نے مزید کہا کہ ’زو پشاور شہر میں روزانہ ڈھائی لاکھ مسافروں کو سفری سہولت مہیا کرتا ہے۔ مسافروں کیلئے سفر کو آسان بنانا زو پشاور کی اولین ترجیح ہے اور ہم اپنی سروس کو بہتر بنانے کیلئے ہمہ وقت کوشاں ہیں۔ اس integration سے مسافروں کو اپنے دفاتر، تعلیمی اداروں، خرید و فروخت کے مراکز اور دیگر جگہوں تک رسائی کیلئے اپنے سفر کی بہتر منصوبہ بندی کرنے کا موقع ملے گا۔‘
گوگل پاکستان کے کنٹری ڈائریکٹر فرحان قریشی نے کہا کہ “ہمیں زو پشاور کے ساتھ اس پارٹنرشپ پر خوشی ہے۔ ہمیں علم ہے کہ بہت سے پاکستانی سفر کیلئے پبلک ٹرانسپورٹ پر انحصار کرتے ہیں، اسلئے بس سٹاپس کی معلومات گوگل میپس پر دستیاب ہونا مسافروں کیلئے ایک جگہ سے دوسری جگہ تک اپنے سفر کی با آسانی منصوبہ بندی کرنے کا ایک بہترین موقع ہے”
۔
مسافر گوگل میپس پر پبلک ٹرانسپورٹ کے آپشن کا انتخاب کر کے اپنی منزل تک بہترین روٹ کی معلومات حاصل کر سکتے ہیں۔ یہ سروس مسافروں کو قریب ترین زو سٹیشن کی نشاندہی، وہاں تک پہنچنے کا راستہ اور درکار وقت، بسوں کے اوقات کی معلومات فراہم کرے گی.
