پشاور: صحافیوں کے لئے سجا رمضان سپورٹس گالا اپنی تمام تر رعنائیوں کیساتھ اختتام پذیر ہوگیا،گزشتہ شب پشاور پریس کلب میں ایک پروقار اختتامی تقریب کا انعقاد کیا گیا جس کے مہمان خصوصی آئی جی پی خیبر پختونخوا اختر حیات خان گنڈاپور تھے جنہوں نے جیتنے والے صحافیوں میں انعامات تقسیم کئے۔
پشاور پریس کلب اور غیر سرکاری تنظیم ہوپ کے زیر اہتمام منعقدہ رمضان سپورٹس گالا اختتام پزیر ہوگیا سپورٹس گالا میں دو خواتین کے جبکہ پانچ مردوں کے مقابلے شامل تھے،خواتین کے کیرم بورڈ کے ایونٹ میں انیلہ شاہین اور شائستہ تسلیم نے پہلی جبکہ سلمہ جہانگیر اور نائیلہ نے دوسری پوزیشن حاصل کرلی اسی طرح لڈو میں انیلہ شاہین نے گولڈ جبکہ اسماء بصیر نے سلور میڈل اپنے نام کرلیا،مردوں کے بیڈمنٹن کے فائنل میں عرفان موسیٰ زئی اور محمد علی شیخ نے ظفر اقبال اور عابد خان کی ٹیم کو 1-2 سے شکست دے کر برتری حاصل کر لی۔
سنوکر کا فائنل طیب عثمان اور ذیشان لیاقت کے مابین کھیلا گیا جس میں طیب عثمان نے کامیابی حاصل کرلی اسی طرح ٹیبل ٹینس کے فائنل میچ میں محمد علی شیخ نے عابد خان کو دو کے مقابلے میں تین پوائنٹس سے شکست دے کر ٹرافی اپنے نام کرلی،لڈو کے فائنل میں ارشاد میدانی نے نادر خواجہ کو ہرا کر برتری حاصل کرلی۔کیرم بورڈ کے ایونٹ میں ذولفقار چاچا نے سفیر احمد کو شکست دے کر فتح حاصل کرلی اسی طرح سینئر بیڈمنٹن چیمپئن شپ کے فائنل میں ارشد عزیز ملک نے شہاب الدین کو دو ایک سے شکست دے کر فائنل جیت لیا۔
اختتامی تقریب سے خطاب کرتے ہوئے مہمان خصوصی انسپکٹر جنرل پولیس خیبر پختونخوا اختر حیات گنڈا پور نے کہا کہ پشاور کے صحافیوں نے بڑے مشکل حالات دیکھے ہیں اور اس مشکل دور میں بھی صحافی برادری نے اپنی فرائض باخوبی سر انجام دینے میں کوئی کسر نہیں چھوڑی اور صوبے کا سافٹ امیج دنیا کو دیکھایا انہوں نے کہا کہ سپورٹس ہمیں ذہنی اور جسمانی نشونما کیساتھ ساتھ زندگی گزارنے کے اصول اور آگے بڑھنے کا حوصلہ دیتی ہے۔ان کا کہنا تھا کہ رمضان کے مہینے میں شام کے بعد اس طرح صحت مندانہ سرگرمیوں میں کثیر تعداد میں شرکت کرنا اور خواتین کے لئے بھی گیمز کا انعقاد کرنا قابل تحسین ہے،واضح رہے کہ رمضان سپورٹس گالا میں 150 مرد و خواتین صحافیوں نے پانچ مختلف گیمز جس میں بیڈمنٹن،ٹیبل ٹینس،سنوکر،لڈو اور کیرم بورڈ شامل ہیں میں بھر پور شرکت کی۔
