ڈی جی سپورٹس خیبر پختونخوا اوپن ٹینس چیمپئن شپ گزشتہ روز پشاور سپورٹس کمپلیکس کے ٹینس کورٹس پر شروع ہو گئی۔ اکاؤنٹنٹ جنرل خیبرپختونخوا مرتضیٰ خان نے باقاعدہ طور پر شاٹ لگا کر مقابلوں کاافتتاح کیا۔ چیمپئن شپ میں مختلف ڈیپارٹمنٹس سمیت صوبہ بھر سے 170 سے زائد کھلاڑی شرکت کررہے ہیں۔ جس کے لئے انعامی رقم ایک لاکھ پچاس ہزار روپے رکھی گئی ہے۔
مہمان خصوصی اکاؤنٹنٹ جنرل خیبرپختونخوا مرتضیٰ خان نے میڈیا سے بات چیت کے دوران صوبائی ٹینس ایسوسی ایشن کے پی سپورٹس ڈائریکٹوریٹ کی کاوشوں کی تعریف کرتے ہوئے کہا کہ ان کی کوششوں سے ٹینس کا یہ میلہ سجایا گیا ہے جس میں ٹاپ رینکنگ پلیئرز شامل ہیں۔ کھلاڑیوں کو اسی طرح مواقع ملتے رہیں تو وہ نہ صرف قومی بلکہ بین الاقوامی سطح پر ملک و قوم کانام روشن کرسکتے ہیں۔ انہوں نے کہا کہ کھلاڑیوں کو بہترین کوچنگ اور بہترین سہولتوں کیساتھ بہترین ڈائٹ اور خاص طور پر حوصلہ افزائی ملنی چاہیئے سپانسرز کو اس کھیل کے فروغ و ترقی کے لئے بھی آگے آنا چاہئے ۔
چیمپئن شپ کے حوالے سے میڈیا سے گفتگو کرتے ہوئے خیبر پختونخوا ٹینس ایسوسی ایشن کے سیکرٹری عمر آیازخلیل نے کہا کہ چیمپئن شپ میں مینز سنگل، مینز ڈبل، بوائز انڈر 10 سنگل، بوائز انڈر 13 اور بوائز انڈر 18 کیٹگری میں کھلاڑیوں صلاحیتوں کا اظہار کررہے ہیں۔ جس میں خیبر پختونخوا سمیت پاکستان ائیرفورس، پاک واپڈا، ایس این جی پی ایل اور پولیس کے کھلاڑی شامل ہیں۔
ان کا کہنا تھا کہ چیمپئن شپ میں حال ہی میں ڈیوس کپ کھیلنے والے کھلاڑی شعیب خان اور خیبر پختونخوا کے بین الا قوامی کھلاڑی برکت اللہ، یوسف علی، اعجاز احمد، ثاقب عمر، عاقب عمر، کاشان عمر، حمزہ رومان، حامد اسرار اور عزیر خان شرکت کررہے ہیں۔ ٹاپ رینکنگ پلیئرز کی موجودگی سے جونیئر کھلاڑیوں کو بھی بہترین کھیل کا موقع ملا ہے اور وہ اس سے اپنے کھیل میں مزید بہتری لا سکتے ہیں جبکہ امید ہے کہ ہمارے صوبے کے ٹاپ رینکنگ ٹینس کھلاڑی مزید ترقی کریں گے اور ملک و قوم کے لئے مزید انٹرنیشنل اعزازات حاصل کریں گے۔
