آئی جی خیبر پختونخوا اختر حیات خان اور سی سی پی او سید اشفاق انور کی ہدایت پر چیف ٹریفک آفیسر ڈاکٹر زاہد اللہ نے شہر میں آلودگی کی روک تھام کو یقینی بنانے کے لئے شہر میں قائم سکولز بسوں کیلئے فٹنس سرٹیفیکیٹس حاصل کرنے کیلئے باقاعدہ لیٹرز جاری کردیا۔ واضح رہے کہ سٹی ٹریفک پولیس پشاور اور ٹرانسپورٹ ڈیپارٹمنٹ (ویٹس) کی ٹیمیں روزانہ کی بنیاد پر آلودگی پھیلانے والی گاڑیوں کے خلاف کاروائی عمل میں لا رہی ہیں۔ چیف ٹریفک آفیسر ڈاکٹر زاہد اللہ نے سکولز مالکان کو ہدایات جاری کی ہیں کہ وہ سردیوں کی چھٹیاں ختم ہونے سے پہلے پہلے ٹرانسپورٹ ڈیپارٹمنٹ سے سکول بسوں کی فٹنس سرٹیفیکیٹس حاصل کریں اور جو بسیں فٹنس سرٹیفیکیٹ کے قابل نہیں ہیں اور دھواں چھوڑتی ہوں ان کی مرمت کی جائے بصورت دیگر قانونی کارروائی عمل میں لائی جائیگی۔ انہوں نے مزید کہا کہ سٹی ٹریفک پولیس پشاور اور ٹرانسپورٹ ڈیپارٹمنٹ (ویٹس) کی جانب سے شہر بھر میں آلودگی پھیلانے کا سبب بننے والی گاڑیوں کے خلاف کارروائیوں کا سلسلہ جاری رہے گا اور اس سلسلے میں کسی کے ساتھ کوئی نرمی نہیں برتی جائے گی۔
