اورکزئی: اورکزئی ہیڈ کوارٹر اور کلایا ہیڈ کوارٹر میں یوم سیاہ کشمیر کے حوالے تقریبات کا انعقاد انتظامیہ افسران اور قبائلی عمائدین کی شرکت۔
نہتے کشمیریوں پر بھارتی مظالم کے خلاف واک کا انتظام کیاگیا۔ یوم سیاہ کشمیر کے حوالے سے اورکزئی ہیڈ کوارٹر تقریب میں ضلعی پولیس آفیسر نذیر خان ضلعی محکموں کے آفسران، قبائلی مشران، اساتذہ، طلباء و طالبات نے شرکت کی جبکہ کلایا ہیڈ کوارٹر میں ڈی ایس پی محبوب خان کی قیادت میں واک کیا گیا جس میں اے ڈی سی شہباز خان خٹک اے سی ابراہیم سمیت افسران نے شرکت کی۔
منعقدہ تقریبات سے خطاب کرتے ہوئے ڈپٹی کمشنر اورکزئی، ڈی پی او اورکزئی اور قبائلی مشران کا کہنا تھا کہ پاکستان کے عوام، حکومت پاکستان اور دنیا بھر میں بسنے والے کشمیری ہر سال 27 اکتوبرکا دن یوم سیاہ کے طور پر مناتے ہیں۔27 اکتوبر 1947 کو بھارت نے اپنی فوجیں کشمیر میں اتارکر غیر قانونی قبضہ کرلیا جو تا حال قائم ہے۔ اُس دن کے بعد سے انسانی حقوق کی خلاف ورزیوں کا ایسا دور شروع ہوا کہ کشمیریوں کو ان کے بنیادی انسانی حقوق سے ہی یکسر محروم کردیا گیا۔
کشمیر کے نہتے عوام پر بھارتی مظالم پر اقوام عالم کی خاموشی افسوسناک ہے۔ ہم اس وقت تک کشمیری بھائیوں کی ہر قسم انسانی، اخلاقی، سفارتی اور سیاسی جدوجہد کی سپورٹ کرتے رہیں گے کہ جب تک انکو اقوام متحدہ کی منظورشدہ قراردادوں کے مطابق حق خودارادیت کا حق نہیں دیا جاتا ۔گزشتہ 75 برس سے کشمیر کے عوام بھارتی جبر کا بہادری سے مقابلہ کر رہے ہیں، منصفانہ جدوجہد میں پاکستان کے عوام کشمیر کے عوام کے ساتھ کھڑے ہیں، پاکستان کے عوام کشمیریوں کو آزادی کی جدوجہد پر خراج تحسین پیش کرتے ہیں، دنیا کو مقبوضہ کشمیر میں انسانی حقوق کی خلاف ورزیوں پر آنکھیں بند نہیں کرنی چاہئیں، طاقت کے بل بوتے پر کشمیریوں کی جدوجہد آزادی کو کچلا نہیں جاسکتا۔
