اسلام آباد: پاکستان میڈیکل اینڈ ڈینٹل کونسل (پی ایم اینڈ ڈی سی) نے بیرونِ ملک میڈیکل اور ڈینٹل تعلیم حاصل کرنے کے خواہشمند طلبہ کے لیے نئے ضوابط متعارف کرا دیے ہیں، جن کے تحت بیرونِ ملک روانگی سے قبل رجسٹریشن لازمی قرار دی گئی ہے۔
اعلامیے کے مطابق ایم ڈی کیٹ امتحان پاس کیے بغیر کسی بھی طالبعلم کو بیرونِ ملک میڈیکل تعلیم حاصل کرنے کی اجازت نہیں ہوگی۔ یہ فیصلے نائب وزیراعظم اسحاق ڈار کی زیرِ نگرانی جاری طبی تعلیمی اصلاحات کے سلسلے میں کیے گئے ہیں۔
پی ایم اینڈ ڈی سی نے واضح کیا ہے کہ بیرونِ ملک داخلے کے لیے متعلقہ میڈیکل ادارے کا کونسل کی منظور شدہ فہرست میں شامل ہونا ضروری ہوگا، جبکہ غیر ملکی ادارے کے لیے World Federation for Medical Education (WFME) سے منظور شدہ ہونا بھی لازمی قرار دیا گیا ہے۔
نئے قواعد کے تحت غیر ملکی میڈیکل گریجویٹس کو پاکستان میں پریکٹس کے لیے نیشنل رجسٹریشن امتحان دینا ہوگا۔ علاوہ ازیں میڈیکل تعلیم کے لیے کم از کم 6200 تدریسی گھنٹے اور 80 فیصد حاضری لازمی قرار دی گئی ہے۔
پی ایم اینڈ ڈی سی نے میڈیکل و ڈینٹل کالجز کے شفاف اور میرٹ پر مبنی انسپکشن پر بھی زور دیا ہے اور خبردار کیا ہے کہ انسپکشن کے عمل میں غفلت یا بے ضابطگی پر زیرو ٹالرنس پالیسی اپنائی جائے گی۔
اعلامیے کے مطابق غیر انگریزی بولنے والے ممالک میں جانے والے طلبہ کو پہلے مقامی زبان سیکھنے کی ہدایت کی گئی ہے، جبکہ بیرونِ ملک روانگی سے قبل طلبہ کو اپنی رہائش اور رابطہ معلومات بھی فراہم کرنا ہوں گی۔
پی ایم اینڈ ڈی سی نے اس عزم کا اعادہ کیا ہے کہ پاکستان میں طبی تعلیم کو عالمی معیار کے مطابق بنایا جائے گا۔
