بونی: آغا خان ایجنسی فار ہیبیٹاٹ پاکستان کے زیر اہتمام بونی میں “ماحولیاتی نظم و نسق اور قدرتی آفات سے بچاؤ” کے موضوع پر دو روزہ معلوماتی و تربیتی پروگرام منعقد کیا گیا، جس میں ماحولیات کے تحفظ، قدرتی آفات کے خطرات میں کمی اور عوامی شعور اجاگر کرنے سے متعلق مختلف امور پر تفصیلی گفتگو کی گئی۔
Chitral Awarness Program in Chitral
پروگرام میں نوجوانوں سمیت مختلف شعبہ ہائے زندگی سے تعلق رکھنے والے افراد نے شرکت کی، جبکہ شرکاء کو ماحول دوست طرزِ زندگی، قدرتی وسائل کے تحفظ اور موسمیاتی تبدیلیوں کے ممکنہ اثرات سے متعلق آگاہی فراہم کی گئی۔
راشدہ ضیاء، چیئرپرسن ڈسٹرکٹ کمیٹی آن دی اسٹیٹس آف وومن اپر چترال، نے پروگرام کو نہایت مفید اور بروقت اقدام قرار دیتے ہوئے منتظمین اور شرکاء کی کاوشوں کو سراہا۔ انہوں نے کہا کہ ماحولیات کے تحفظ اور قدرتی آفات سے نمٹنے کے لیے عوامی شعور بیدار کرنا وقت کی اہم ضرورت ہے، جبکہ اس نوعیت کے پروگرام محفوظ، صاف اور پائیدار ماحول کے قیام میں اہم کردار ادا کرتے ہیں۔
PMU-UGPP کے اشتراک سے کھوت ویلی اور میلپ ویلی میں تربیتی ورکشاپس کا انعقاد
دریں اثنا چترال فارسٹ ڈویژن نے PMU-UGPP کے اشتراک سے کھوت ویلی اور میلپ ویلی میں تربیتی ورکشاپس کا انعقاد کیا، جن کا مقصد رینج مینجمنٹ سے متعلق آگاہی فراہم کرنا اور معیاری کچن گارڈننگ بیجوں کی تقسیم تھا۔
ورکشاپس میں نسرین بی بی، بلاک آفیسر محمد امین، فوکل پرسن شاہدہ پروین، فارسٹ اسٹاف، خواتین تنظیموں، مقامی نمائندگان اور مختلف علاقوں سے تعلق رکھنے والی خواتین نے شرکت کی۔ کھوت ویلی میں چیئرمین منہاج الدین جبکہ میلپ ویلی میں سابق کونسلر صالحہ بی بی بھی موجود تھیں۔
منتظمین کے مطابق موسمی سبزیوں کے مختلف بیج اور پودے مقامی کمیونٹی، خصوصاً خواتین سربراہ خاندانوں اور کمزور گھرانوں میں تقسیم کیے گئے۔ ان کا کہنا تھا کہ تقسیم کیے گئے بیج موسمیاتی تبدیلیوں سے مطابقت، بہتر پیداوار اور غذائی ضروریات کو مدنظر رکھتے ہوئے منتخب کیے گئے تھے، جبکہ اس نوعیت کی سرگرمیوں کو غذائی تحفظ اور موسمیاتی چیلنجز سے نمٹنے کے لیے اہم قرار دیا گیا۔
